Тайвань дэманструе разбуральную зброю ЗША

• 18.09.2025, 17:14

Востраў гатовы адказаць Кітаю.

Тайвань упершыню прадэманстраваў амерыканскі асноўны баявы танк M1A2T Abrams і рэактыўную сістэму залпавага агню HIMARS. Паказ стаў часткай стратэгіі «шматузроўневага стрымлівання», скіраванай на ўзмацненне абароны вострава на фоне нарастаючага ціску з боку Кітая, піша Interesting Engineering (пераклад — сайт Charter97.org).

Акрамя Abrams і HIMARS, на выставе былі прадстаўлены супрацьракетная ўстаноўка «Цзян-Кун», ПТРК TOW 2B на пазадарожніках Humvee, мадэлі вучэбнага самалёта Brave Eagle і лёгкага фрэгата.

ЗША ў 2019 годзе ўхвалілі продаж Тайваню 108 Abrams. Першая партыя з 38 танкаў прыбыла ў канцы 2024-га, у ліпені 2025-га — яшчэ 42. Машыны праходзяць падрыхтоўку ў Хсіньчжу, дзе плануюцца маштабныя баявыя вучэнні. Abrams абсталяваныя 120-мм гарматай, цяжкім кулямётам і кампазітнай бранёй, развіваюць хуткасць да 64 км/г.

Тайвань таксама замовіў 29 HIMARS і мае намер набыць яшчэ 28, давёўшы парк да 57 установак. Гэтыя сістэмы здольныя запускаць кіраваныя ракеты з далёкасцю да 85 км або ракеты ATACMS на 300 км. Першыя баявыя стрэльбы HIMARS адбыліся вясной і летам 2025 года.

Прыбыццё Abrams і HIMARS сімвалізуе якасны скачок у магчымасцях Тайваня: бранятэхніка ўзмацняе сухапутныя войскі, а HIMARS забяспечвае дакладныя ўдары па дэсантных сілах і ракетных батарэях праціўніка. Да канца дзесяцігоддзя востраў разлічвае цалкам інтэграваць новыя платформы ў сумесныя вучэнні і павысіць сваю мабільнасць і баяздольнасць.