Еўрасаюз узмацняе ціск на Маскву

• 18.09.2025, 15:46

Новы пакет санкцый Еўракамісія можа афіцыйна прэзентаваць ужо заўтра, 19 верасня.

Еўрапейская камісія плануе прэзентаваць новы, 19-ы пакет санкцый супраць Расіі ў пятніцу, 19 верасня.

Гэтай інфармацыяй падзяліліся з карэспандэнтам «Еўрапейскай праўды» два дыпламаты з уплывовых дзяржаў ЕС у Бруселі на ўмовах ананімнасці.

19-ы пакет санкцый Еўрасаюза супраць Расіі можа быць перададзены на зацвярджэнне ў Раду ЕС ужо 19 верасня.

«Наколькі мне вядома, 19-ы пакет будзе перададзены Камісіяй у Раду ЕС заўтра, у пятніцу», — паведаміў «Еўрапейскай праўдзе» адзін з дыпламатаў.

Іншы дадаў, што пакуль яму невядома, ці будзе публічная прэзентацыя санкцыйнага пакета, ці спачатку прапанову Еўракамісіі абмяркуюць дзяржавы-члены.

Адказваючы на пытанні журналістаў у Бруселі 18 верасня, прадстаўнікі Еўракамісіі адмовіліся называць канкрэтную дату гатоўнасці новага пакета санкцый, але пацвердзілі, што ён будзе прадстаўлены ў найбліжэйшы час.

«Мы чакаем хутка прэзентаваць 19-ы пакет санкцый», — паведаміў намеснік галоўнага прадстаўніка Олаф Гіл.

Ён не паведаміў іншых падрабязнасцей пра змест новага пакета.