Расею штурхаюць у бездань нафтавага калапсу

• 18.09.2025, 12:21

Невычэрпных рэсурсаў у прыродзе не існуе.

Сілы абароны Украіны 16 верасня нанеслі ўдар па Саратаўскім нафтаперапрацоўчым заводзе. Гэтае прадпрыемства задзейнічана ў забеспячэнні патрэбаў Узброеных сіл РФ і ўжо не раз падвяргалася атакам украінскіх дронаў. У прыватнасці, у сярэдзіне жніўня гэты НПЗ спыняў прыём нафты пасля ўдараў нашых беспілотнікаў. Расійская «нафтаўка» гарыць так часта, што мы паступова прывыкаем да падобных паведамленняў.

За гэтымі навінамі хаваецца яшчэ адна тэндэнцыя: Расея скарачае экспарт і, верагодна, будзе вымушана скараціць здабычу нафты, бо тэхнічныя магчымасці па захоўванні нафты і нафтапрадуктаў усё змяншаюцца… Макраэканамічныя паказчыкі РФ засакрэчаныя, але схаваць агульныя тэндэнцыі экспартна арыентаваных галін расіяне не могуць — гандлёвыя партнёры ўсё адно даведаюцца пра рэальны стан спраў у сваіх кантрагентаў.

Першая навіна пра зніжэнне экспарту з’явілася яшчэ напрыканцы ліпеня: за першыя сем месяцаў 2025 года Масква экспартавала на 4 % менш сырой нафты, чым за аналагічны перыяд 2024 года. Другое «трывожнае паведамленне» эканамічныя партнёры Расеі атрымалі напрыканцы жніўня: на фоне атак украінскіх дронаў усяго за адзін тыдзень экспарт упаў на 320 тысяч барэляў у дзень, дасягнуўшы найніжэйшага ўзроўню за месяц.

Сусветнае інфармацыйнае агенцтва Reuters са спасылкай на тры крыніцы ў галіне паведаміла, што расійскія нафтаперапрацоўчыя прадпрыемствы спыняюць прыём нафты ад здабыўных кампаній на захоўванне ў сваёй сістэме. Крыніцы Reuters мяркуюць, што Расеі давядзецца скараціць здабычу нафты, калі атакі ўкраінскіх дронаў не спыняцца. А яны не спыняцца — мы гэта гарантуем.

Гэта вельмі пазітыўная для нас тэндэнцыя, бо ўдары ў глыб тэрыторыі Расеі дазваляюць не толькі скараціць пастаўкі паліва расійскай арміі, але і ў цэлым падарваць ваенна-эканамічны патэнцыял праціўніка. Колькасць нашых удараў пераходзіць у новую якасць: паступова разбураецца ключавая галіна ворага — экспарт вуглевадародаў. Пастаяннае пагаршэнне эканамічных паказчыкаў, тэарэтычна, можа прывесці да калапсу расійскай дзяржаўнасці.

Якім бы ні быў эканамічны або дэмаграфічны патэнцыял ворага, мы разумеем, што невычэрпных рэсурсаў у прыродзе не існуе. У той жа час мы не чакаем, што Расея «калапсне» заўтра, і ўсведамляем, што ў нас наперадзе яшчэ вельмі шмат працы. Кожны дзень мы робім маленькі крок да вялікай мэты і бачым канкрэтныя вынікі, якія натхняюць. Слава Украіне!

Юрый Федарэнка, «Фэйсбук»