Прэм'ер Швецыі разнёс Орбана
- 18.09.2025, 2:00
Прэм'еры Венгрыі і Швецыі ўступілі ў завочную перапалку ў сацсетцы X.
Прэм'ер-міністры Венгрыі і Швецыі Віктар Орбан і Ульф Крыстэрсан у сераду працягнулі завочную перапалку ў X, у якой Орбан абвінавачвае шведскі ўрад у неэфектыўнай барацьбе са злачыннасцю.
Пра гэта паведамляе «Еўрапейская праўда».
У сваім допісе ў X у сераду Орбан «паспачуваў шведскаму народу» з-за, як ён апісаў, засілля нелегальных мігрантаў і ўсплёску злачыннасці. Пры гэтым ён дадаў, што ў Венгрыі ўсё «бяспечна, у парадку і пад кантролем».
Шведскі прэм'ер-міністр у адказ напісаў разгорнуты допіс, дзе нагадаў, як Швецыя выказала салідарнасць з Венгрыяй падчас генацыду яўрэяў у 1944 годзе і падаўлення антыкамуністычнага паўстання ў 1956-м.
«Дэмакратычныя дзяржавы дапамагаюць адна адной, як тады, так і цяпер. І яны выступаюць супраць краін, якія спрабуюць прыгнятаць іншых. Вось чаму, як у 1944 і 1956 гадах, мы падтрымліваем дэмакратычныя краіны, якія расійскія танкі спрабуюць захапіць. Тады гэта была Венгрыя, сёння — Украіна. І калі мы не будзем дзейнічаць, заўтра гэта можа быць іншая краіна», — напісаў Крыстэрсан.
Ён дадаў, што менавіта таму Швецыя часта выказвае заклапочанасць падзеямі апошніх гадоў у Венгрыі і крытыкуе тое, што «вы ідзяце на каву з лідарам той самай краіны, якая ў 1956 годзе падавіла барацьбу вашых суайчыннікаў за свабоду і якая сёння атакуе вашага суседа, Украіну».
Прэм'ер Швецыі таксама працытаваў словы Орбана з 2007 года, дзе той заклікаў да далейшай арыентацыі Венгрыі на Захад словамі: «Нафта можа паступаць з Усходу, але свабода заўсёды паступае з Захаду».
Крыстэрсан асобна адзначыў, што ў Венгрыі працягваецца перадвыбарчая кампанія, дзе партыя Орбана мае шанцы страціць уладу, і дадаў, што Швецыя не збіраецца ўмешвацца ў яе.
Некалькі дзён таму прэм'ер-міністр Швецыі ўжо раскрытыкаваў венгерскага лідара за распаўсюджанне «абуральнай хлусні» пасля таго, як Орбан заявіў, што Швецыя знаходзіцца на мяжы калапсу з-за бескантрольнай дзейнасці арганізаванай злачыннасці.
І Швецыя, і Венгрыя ў наступным годзе правядуць выбары — у Швецыі яны адбудуцца ў верасні, а ў Венгрыі — у красавіку.