У Беларусі пенсіянер правёў у лесе пяць сутак без ежы і вады

• 17.09.2025, 22:27

Мужчыне ўдалося выжыць.

У Беларусі некалькі дзён шукалі пажылога мужчыну, які згубіўся ў лесе. Падрабязнасцямі падзяліліся ў Telegram-канале газеты «На страже».

Пра знікненне пенсіянера паведаміў яго брат. Ён распавёў, што 66-гадовы жыхар Міёрскага раёна пайшоў па ягады каля вёскі Малая Кавалёўшчына і знік. На той момант пра пенсіянера нічога не было вядома ўжо трое сутак.

Адразу прыступілі да пошукаў. Людзі аглядалі квадрат за квадратам, задзейнічалі беспілотнік. Аднак мясцовасць там балотная, што ўскладняла пошукавую аперацыю.

І толькі 16 верасня ўсе намаганні нарэшце далі вынік: адзін з супрацоўнікаў Міёрскага РАУС пачуў ціхі стогн у зарасцях камышу.

Пажылы мужчына, які правёў у лесе пяць сутак, моцна знясілеў і не мог гаварыць, у яго было сур'ёзнае пераахаладжэнне. Пенсіянера на насілках адтуль вынеслі і даставілі да медыкаў.