Салон прыгажосці на колах: дэбютаваў незвычайны пазадарожнік Lexus

• 17.09.2025, 13:37

Аўто зроблена ў стылістыцы Барбі.

Новы Lexus Glam LX стварылі ў супрацоўніцтве з тэхаскай цюнінгавай студыяй Complete Customs. Пра пазадарожнік расказалі на афіцыйным сайце японскага аўтавытворцы.

Lexus Glam LX цалкам падыдзе на ролю аўто Барбі. Пазадарожнік пафарбавалі ў перламутравы ружовы колер, а яго лагатып упрыгожылі стразамі.

Заднія дзверы аўтамабіля цяпер адкрываюцца супраць руху. Бела-ружовы салон упрыгожылі не толькі скурай, але і мохерам, шоўкам і каштоўнымі камянямі.

У бардачку Lexus LX усталявалі манікюрны набор. На заднім радзе абсталявалі сапраўдны салон прыгажосці з раскладнымі столікамі, люстэркамі, ультрафіялетавым асвятленнем, наборам для макіяжу і нават фэнам. Ёсць і невялікі халадзільнік паміж сядзеннямі.

Яшчэ больш арыгінальным стаў багажнік Lexus LX, бо яго ператварылі ў шафу для адзення і абутку. Дзверы цяпер складаюцца з двух палавінак, якія знутры ўпрыгожылі люстэркамі.

Тэхнічная начынка Lexus LX не змянілася. Рамны пазадарожнік аснашчаны 3,5-літровым бензінавым V6 бітурба магутнасцю 415 к. с. і 10-ступеньчатай аўтаматычнай каробкай перадач.