Джо Байдэн перажывае фінансавыя цяжкасці
- 16.09.2025, 21:48
Былы прэзідэнт ЗША вядзе сціплы лад жыцця.
Сваё першае пасля завяршэння прэзідэнцкага тэрміну святкаванне Дня незалежнасці Джо Байдэн правёў у дарагім трэйлерным парку. Былая прэзідэнцкая сям'я спынілася ў шыкоўным квартале, у доме музыканта Мобі, сябра сына Хантара Байдэна. Сам былы прэзідэнт з жонкай аселі на пляжы і павечарылі ў пясчаным кутку кафэ Paradise Cove Beach, піша The Wall Street Journal.
Гэта рэзка кантрастуе з тым, як праводзілі лета яго калегі. Барак і Мішэль Абама адпачывалі на востраве Мартас-Він'ярд, а Біл і Гілары Клінтан у смокінгах і вячэрніх сукенках наведалі вяселле ў Гэмптансе — свята аб'яднала Хуму Абедын, былую супрацоўніцу Гілары, і сына мільярдэра і галоўнага дэмакратычнага донара Джорджа Сораса.
82-гадовы Байдэн вымушаны пракладаць сабе менш прыбытковы, чым ён чакаў, пасляпрэзідэнцкі шлях. Шырокія магчымасці абмежаваныя яго ўзростам, непапулярнасцю сярод дэмакратаў і нежаданнем кампаній, якія баяцца рэакцыі прэзідэнта Трампа, прапаноўваць яму кантракты на выступы. Нават саюзнікі Байдэна ўсё рэзчэй ацэньваюць яго кадэнцыю. Нядаўна былая віцэ-прэзідэнтка Камала Харыс у новай кнізе заявіла, што Дэмакратычная партыя безадказна дазволіла Байдэну балатавацца другі раз.
У выніку наступная глава жыцця Байдэна аказваецца больш сціплай — без добра прафінансаваных фондаў, планаў раскошных бібліятэк і каляндара, запоўненага платнымі лекцыямі, як у яго папярэднікаў.
Замест прыватных самалётаў Байдэна бачылі з кнігай на каленях у першым класе самалётаў American Airlines або ў «ціхім вагоне» цягнікоў Amtrak. Паводле звестак дасведчаных асоб, ганарары за выступы вагаюцца ад 300 да 500 тысяч долараў. Заказчыкаў няшмат, а некаторыя арганізацыі нават спрабавалі знізіць суму ніжэй за гэты ўзровень.
У першыя тыдні пасля сыходу з пасады Байдэн дзяліўся з некаторымі знаёмымі, што плануе пагасіць каля 800 тысяч долараў асабістых даўгоў, у прыватнасці па крэдытах на дом у Рэга-Біч коштам 2,7 мільёна долараў, які яны з Джыл Байдэн набылі ў чэрвені 2017 года. Сёлета, паводле адкрытых крыніц, падатак на маёмасць вырас яшчэ на 20%.
Да выдаткаў дадаліся і юрыдычныя праблемы Хантара Байдэна. Акрамя таго, былы прэзідэнт хоча дапамагчы дачцэ Эшлі, якая ў мінулым месяцы падала на развод, і пакінуць сродкі для ўнукаў.
Адчувальную фінансавую падпітку забяспечыць кантракт на кнігу коштам каля 10 мільёнаў долараў. Байдэн таксама атрымлівае пенсіі за федэральную службу ў памеры да 416 тысяч долараў на год, з якіх прыблізна 250 тысяч — як былы прэзідэнт, і да 166 тысяч — за гады ў Кангрэсе і на пасадзе віцэ-прэзідэнта.
Джыл Байдэн пакінула працу выкладчыцы ў каледжы, дзе зарабляла каля 100 тысяч долараў на год, і ўзначаліла новую сетку па пытаннях жаночага здароўя ў Інстытуце Мілкена, які заснаваў былы фінансіст Майкл Мілкен. Гэта пасада неаплатная.
Паводле слоў людзей, знаёмых з фінансамі сям'і, калі Байдэны захаваюць адносна сціплы лад жыцця, яны «спраўяцца». Але іншыя адзначаюць: гэтая сям'я мае схільнасць да раскошы, асабліва калі плаціць хтосьці іншы.
За апошнія гады сям'я назапасіла нямала даўгоў. Фінансавыя дакументы сведчаць пра іпатэку ў TD Bank, узятую ў 2013 годзе, і крэдыт пад заклад маёмасці ў M&T Bank, узяты Байдэнам у 2022-м.