Начальнік Генштаба Польшчы: Беларусь хавае забойцу нашага вайскоўца

• 16.09.2025, 20:16

Рана ці позна ён прадстане перад судом.

Начальнік Генеральнага штаба Войска Польскага генерал Веслаў Кукула у інтэрв'ю для тэлеканала TVP Info пракаментаваў падзеі апошняга тыдня, у тым ліку атаку расійскіх беспілотнікаў на тэрыторыю Польшчы і ролю Беларусі ў цяперашняй геапалітычнай сітуацыі. Некаторыя яго словы прыводзіць Onet.pl.

Генерал Кукула падкрэсліў, што польскае войска і сілы НАТА былі гатовыя да інцыдэнту і маглі справіцца нават з горшым сцэнарам. Ён адзначыў, што ў ноч з 9 на 10 верасня, калі расійскія дроны заляцелі ў паветраную прастору Польшчы, рэакцыя была імгненнай і скаардынаванай.

«Не атакуюць таго, хто не баіцца, хто падрыхтаваны. Сілы НАТА адрэагавалі як адзін кулак. Са мной звязваліся калегі з іншых краін. Мы былі гатовыя да горшага варыянту развіцця падзей, чым той, што адбыўся», — запэўніў генерал.

Ён таксама растлумачыў, чаму не ўсе дроны былі збітыя:

«Моцная армія спалучае дух з розумам. Калі хтосьці запускае дроны-прынады, ён разлічвае, што мы выдаткуем свае сродкі супрацьпаветранай абароны, а потым можа ўдарыць балістычнымі або крылатымі ракетамі».

Начальнік Генеральнага штаба Войска Польскага таксама выказаў меркаванне, што ў найбліжэйшыя гады Польшчы пагражае не столькі прамая вайна, колькі жыццё ў «часы пастаяннай трывогі». Ён падтрымаў уключэнне сірэн паветранай трывогі ў гарадах на ўсходзе краіны, назваўшы гэта неабходным крокам для падрыхтоўкі насельніцтва да жыцця ва ўмовах «падтрымання пастаяннай гатоўнасці».

«Расія застаецца моцнай і непрадказальнай. Пры спрыяльных абставінах яна можа напасці на нас ваенным шляхам», — пракаментаваў генерал Кукула.

Найбольш рэзка кіраўнік Генштаба выказаўся ў адрас Беларусі.

«У нас абмежаваны давер да Беларусі. Трэба памятаць, што яны хаваюць забойцу нашага вайскоўца [Матеуша Сітака]. Яны ведаюць, хто гэта. І мы ведаем. Настане такі дзень, што мёртвы ці жывы ён прадстане перад правасуддзем», — заявіў генерал.