Штайнмаер і Мерц адмовілі Польшчы ў выплаце рэпарацый
- 16.09.2025, 19:28
Прэзідэнт Польшчы выстаўіў патрабаванні аб выплаце яго краіне рэпарацый падчас першага візіту ў Берлін.
Новы прэзідэнт Польшчы Кароль Навроцкі падчас свайго першага афіцыйнага візіту ў Берлін атрымаў адмову на свае патрабаванні аб выплаце Германіяй рэпарацый за шкоду, нанесеную яго краіне падчас Другой сусветнай вайны. Федэральны прэзідэнт Франк-Вальтэр Штайнмаер, як і раней, рашуча адхіліў гэтыя патрабаванні, падкрэсліўшы, што гэтае пытанне «з пункту гледжання Германіі канчаткова вырашана», — перадае DW са спасылкай на агенцтва dpa ў аўторак, 16 верасня.
Пасля размовы з нямецкім калегам польскі прэзідэнт таксама вылучыў гэтае патрабаванне і падчас наступнай размовы тэт-а-тэт з канцлерам Фрыдрыхам Мерцам. Паводле інфармацыі dpa з урадавых колаў, у гэтай размове канцлер пацвердзіў «канчатковую» пазіцыю Германіі.
Пасля праведзеных перамоў у Берліне не было прэс-канферэнцый, што незвычайна для такога важнага партнёра Германіі, як Польшча, падкрэслівае агенцтва. Гэта выклікала крытычныя пытанні з боку нямецкіх журналістаў, а польскія СМІ цытавалі Навроцкага па яго паведамленні ў сацсетцы X.
Як напісаў польскі прэзідэнт у сацсетцы X, ён «выразна падкрэсліў як пытанні, якія нас аб’ядноўваюць, так і чаканні Польшчы ад нямецкага боку». Паводле яго слоў, на сустрэчы са Штайнмаерам ішла размова пра праблемы бяспекі ў рэгіёне, будучыню ЕС і «кампенсацыю шкоды, нанесенай Польшчы падчас Другой сусветнай вайны».
Незадоўга перад сваім прыбыццём у Берлін польскі прэзідэнт заявіў газеце Bild: «Пытанне аб рэпарацыях, вядома, з юрыдычнага пункту гледжання не закрыта». У тым жа інтэрв’ю ён выказаў «цвёрдую перакананасць у тым, што мы дасягнем пагаднення з канцлерам і прэзідэнтам Германіі». Як і раней, Польшча настойвае на выплаце Германіяй 1,3 трыльёна еўра. «Гэта адзіная лічба, якая мае сваю кропку адліку ў вельмі глыбокіх і абгрунтаваных навуковых даследаваннях», — паўтарыў Навроцкі пазіцыю папярэдніх польскіх уладаў.