Лукашысты збіраюцца ўвесці чарговае валютнае наваўвядзенне

• 16.09.2025, 17:00

Як гэта закране беларусаў?

Дэпутаты «парламента» 16 верасня ў другім чытанні зацвердзілі законапраект з зменамі, якія тычацца валюты, а таксама нерухомасці і рэкламы. «Зеркало» распавядае падрабязнасці.

Законапраектам хочуць абмежаваць пазыкі паміж фізічнымі асобамі ў замежнай валюце. Выключэнне — блізкія сваякі. Таксама ўлады маюць намер забараніць выдаваць пазыкі насельніцтву пад заклад адзінага жылога дома або кватэры.

Чыноўнікі таксама маюць намер забараніць індывідуальным прадпрымальнікам і юрыдычным асобам, якія не займаюцца мікрафінансавай дзейнасцю, выдаваць крэдыты фізічным асобам. Выключэнне маюць намер зрабіць для пазык, якія наймальнікі выдаюць сваім работнікам.

Яшчэ адно магчымае наваўвядзенне — увесці абмежаванні па штрафах і пенях па дагаворах пазыкі паміж фізічнымі асобамі.

Таксама чыноўнікі хочуць увесці забарону на выкарыстанне ў рэкламе кампаній, якія не з’яўляюцца мікрафінансавымі арганізацыямі, слоў «пазыка», «мікрапазыка», «мікрафінансаванне», «грошы ў доўг» або вытворных ад гэтых слоў.

«Дэпутат» Аляксей Райко, які працуе ў пастаяннай камісіі па бюджэце і фінансах, заявіў, што змены хочуць увесці для абароны пазычальнікаў — фізічных асоб. А яшчэ — для зніжэння даўгавой нагрузкі на людзей. Таксама чыноўнікі хочуць выключыць «дагаворы пазыкі на кабальных умовах» і павысіць давер насельніцтва да фінансавага сектара.