Польшча рыхтуецца да абароны пасля атакі расійскіх дронаў

• 16.09.2025, 15:05

Тысячы палякаў запісваюцца на ваенныя курсы.

Упершыню за гісторыю НАТА Расія парушыла межы Альянсу. Больш за 20 дронаў, выпушчаных падчас масіраванай атакі на Украіну, уварваліся ў паветраную прастору Польшчы. Гэты інцыдэнт стаў паваротным момантам — тысячы палякаў пачалі запісвацца на добраахвотныя ваенныя курсы, піша National Security Journal (пераклад — сайт Charter97.org).

Прэм'ер-міністр Польшчы Дональд Туск абвясціў пра стварэнне ізраільскай мадэлі рэзерву — 500 тысяч падрыхтаваных грамадзянаў, гатовых да вайны ў выпадку неабходнасці. «Кожны дарослы мужчына павінен быць гатовы да абароны Радзімы», — падкрэсліў Туск, дадаўшы, што жанчыны таксама актыўна далучаюцца, часта выкарыстоўваючы адпускі для праходжання падрыхтоўкі.

Сёння Польшча мае трэцюю па колькасці армію ў НАТА пасля ЗША і Турцыі і траціць на абарону рэкордныя 4,7% ВУП — больш, чым Германія, Францыя або Вялікабрытанія. Плануецца, што да канца 2025 года праграму падрыхтоўкі пройдуць каля 40 тысяч добраахвотнікаў, што больш чым удвая перавышае ўзровень 2022 года.

Для многіх удзел у навучанні мае асабістую матывацыю. «Я гатовая на ўсё, каб абараніць свайго сына», — распавяла адна з жанчын-удзельніц.

Гістарычная памяць таксама адыгрывае сваю ролю. Дзесяцігоддзі савецкай акупацыі і камуністычнага панавання застаюцца балючым напамінам для краіны. Польшча баіцца паўтарэння сцэнара Украіны і дэманструе рашучасць.

Нягледзячы на дэмаграфічны спад, Варшава мае намер павялічыць колькасць арміі амаль на трэць у бліжэйшае дзесяцігоддзе. Эксперты адзначаюць, што Расія сваімі дзеяннямі дасягае супрацьлеглага эфекту — замест запалохвання яна толькі ўмацоўвае рашучасць Польшчы і ўсяго Паўночнаатлантычнага альянсу.