Беларус паказаў «цікавае архітэктурнае рашэнне» ў «Minsk World»

• 16.09.2025, 15:00

Суседскі балкон напалову ўпіраецца проста ў акно адной з кватэр.

Спецыяліст па рамонце Уладзімір паказаў у TikTok «цікавае архітэктурнае рашэнне» ў жылым комплексе «Minsk World»: суседскі балкон напалову ўпіраецца проста ў акно адной з кватэр, і адтуль добра відаць, што адбываецца ўнутры.

— Цікавае архітэктурнае рашэнне, — пракаментаваў мужчына, дадаўшы, што з жыхарамі суседняй кватэры ў гэтым выпадку можна будзе размаўляць у духу «здарова, сусед, давай налівай».

Ён падкрэсліў, што калі спілаваць агароджу, дык чужы балкон будзе займаць «палову акна».

Таксама аўтар відэа адзначыў, што шклапакеты ў кватэры «амаль усе пашкоджаныя», таму іх давядзецца мяняць. Паводле яго слоў, дом знаходзіцца на вуліцы Алфёрава, 1.

У каментарыях звярнулі ўвагу, што прылеглы да акна кут балкона моцна загажаны галубамі, і выказалі меркаванне, што «паводле праекта гэта туалет для птушак».

Таксама былі меркаванні, што гэта месца «для навагодняй ёлкі або фікуса» ці «для ката».

Шмат хто ў цэлым крытыкаваў якасць жылля ў квартале:

«Minsk World» не для камфорту дольшчыкаў, а для вываду грошай інвестары будуюць, балкон у акне — гэта яшчэ пачатак, хутка вадаспады, фантаны з каналізацыі, дзякуй, калі вокны не выляцяць і фасад не адваліцца».

«Дамы жудасныя… усё цячэ… расколіны… Праверылі выпарэнні на шкоднасць, прадалі».

Адзін з каментатараў прапанаваў выхад з сітуацыі: «Можна паспрабаваць заклеіць гэты бок акна напаўпразрыстай плёнкай з эфектам размыцця, на Wildberries ёсць — плёнка ад чужых вачэй».

Судзячы па новым відэа, аўтар менавіта так і прымяніў і застаўся задаволены.