Маск можа трапіць пад санкцыі ў Вялікабрытаніі

• 16.09.2025, 13:56

За «небяспечныя выказванні».

Прэм’ер-міністра Вялікабрытаніі Кіра Стармера прызвалі разгледзець магчымасць увядзення санкцый супраць мільярдэра Ілона Маска пасля яго выступлення на антымігранцкім мітынгу ў Лондане, піша часопіс TIME (пераклад — сайт Charter97.org).

Мільярдэр і кіраўнік Tesla звярнуўся па відэасувязі да ўдзельнікаў акцыі, арганізаванай правым актывістам Томі Робінсанам. Паводле ацэнак, мерапрыемства сабрала да 100 тысяч чалавек. У сваёй прамове Маск заявіў, што «гвалт ідзе да вас» і што «альбо вы змагаецеся, альбо паміраеце», ён назваў «масавую некантраляваную міграцыю» прычынай «развалу Брытаніі».

Лідэр Ліберальных дэмакратаў Эд Дэйві накіраваў Стармеру ліст, у якім абвінаваціў Маска ў падбухторванні да гвалту і спробах пасеяць разлад у краіне. Ён заклікаў усіх лідэраў партый публічна асудзіць гэтыя выказванні і абмеркаваць санкцыі супраць прадпрымальніка.

Маск адрэагаваў у сацсетцы X, назваўшы Дэйві «трусам-падлюгай».

Стармер у адказ падкрэсліў, што Брытанія ганарыцца сваёй талерантнасцю, а нацыянальны сцяг «ніколі не будзе сімвалам гвалту і падзелу». Яго прэс-сакратар дадаў, што «небяспечная рыторыка» Маска можа прывесці да гвалту на вуліцах.

Лідэр партыі Reform UK Найджэл Фарадж заявіў, што словы Маска гучалі неадназначна: «Калі гаворка ішла пра змаганне за свабоду слова і за перамогу на выбарах — гэта адна гісторыя. Але кантэкст пакінуў месца для інтэрпрэтацый».

Паводле даных паліцыі, падчас мітынгу пацярпелі 26 супрацоўнікаў, затрыманыя прынамсі 25 чалавек. Праваахоўнікі працягваюць расследаванне.

Мітынг стаў чарговым эпізодам у шэрагу пратэстоў супраць міграцыйнай палітыкі ўрада, узмацніўшы напружанасць вакол размяшчэння бежанцаў у краіне.