Эстонія пачала будаўніцтва 40-кіламетровага супрацьтанкавага рова на ўсходняй мяжы

• 16.09.2025, 11:32

Ён будзе абсталяваны «зубамі дракона» і калючым дротам.

Урад Эстоніі пачаў будаўніцтва магутных абарончых збудаванняў для ўзмацнення бяспекі на ўсходняй мяжы.

Пра гэта піша ERR.

Адзначаецца, што на працягу наступных двух гадоў уздоўж усходняй мяжы будзе выкапаны 40-кіламетровы супрацьтанкавы роў, які з'яўляецца часткай запланаванай сістэмы Балтыйскай абарончай зоны ў Эстоніі.

Адзначаецца, што пакуль паўкіламетровы супрацьтанкавы роў быў выкапаны па-за агароджай у вёсцы Вінскі паблізу Меремяэ, будучыя супрацьтанкавыя рвы будуць выкапаныя ўнутры загараджальнай агароджы, якая таксама будзе абсталяваная «зубамі дракона» і калючым дротам.

«Паколькі ў нас ёсць добры прыродны бар'ер на паўночным усходзе Эстоніі ў выглядзе ракі Нарвы і возера Пейпсі на ўсходзе, мы плануем пабудаваць 40-кіламетровы супрацьтанкавы роў на паўднёва-ўсходзе Эстоніі, каб спыніць ворага. То-бок уздоўж усёй мяжы, дзе гэта неабходна», — сказаў падпалкоўнік Айнар Афанасьеў, начальнік штаба Узброеных сіл.

Паводле яго слоў, у балотістых раёнах гэта не патрэбна, бо «туды немагчыма дабрацца на тэхніцы».

«Да канца 2027 года мы павінны мець гатовымі больш за 40 кіламетраў супрацьтанкавых рвоў. А таксама амаль 600 бункераў», — адзначыў вайсковец.

Кіраўнік праекта аддзела закупак RKIK Армін Сііліваск адзначыў, што ў гэтым годзе плануюць стварыць два пункты падтрымкі: адзін у паўночна-ўсходняй Эстоніі, а другі — у паўднёва-ўсходняй Эстоніі; яны будуць уключаць да 14 дадатковых пунктаў, размешчаных у ландшафце.

«У гэтым годзе мы таксама плануем стварыць склады. Цяпер усе матэрыялы для бар'ераў знаходзяцца на часовых складах, але ў гэтым годзе мы перавезем іх на склады, каб гэтыя матэрыялы былі як мага бліжэй да пунктаў падтрымкі», — дадаў ён.