Выбухі і пажар: у Расіі паражаны Саратаўскі НПЗ

• 16.09.2025, 10:58

Генштаб ЗСУ раскрыў падрабязнасці.

У ноч на аўторак, 16 верасня, падраздзяленні Сіл спецыяльных аперацый ЗСУ, ва ўзаемадзеянні з іншымі складнікамі Сіл абароны, нанеслі ўдар па Саратаўскім нафтаперапрацоўчым заводзе.

Пра гэта паведаміў Генштаб ЗСУ.

Адзначаецца, што ў раёне аб’екта былі зафіксаваныя выбухі і пажар.

Вынікі ўдару ўдакладняюцца.

Паводле даных Генштаба, Саратаўскі НПЗ спецыялізуецца на вытворчасці бензіну, дызельнага паліва, мазуту, а таксама розных марак бітуму, вакуумнага газойля, тэхнічнай серы і таму падобнага. Усяго — больш за 20 відаў нафтапрадуктаў.

Аб’ём перапрацоўкі ў 2023 годзе склаў 4,8 млн тон.

Паведамляецца, што прадпрыемства задзейнічана ў забеспячэнні патрэб Узброеных Сіл РФ.

«Сілы абароны Украіны паслядоўна ажыццяўляюць мерапрыемствы, накіраваныя на падрыў ваенна-эканамічнага патэнцыялу расійскай федэрацыі, у прыватнасці яе здольнасці забяспечваць акупацыйныя войскі гаручым, боепрыпасамі і ўзбраеннем, а таксама з мэтай спынення ўзброенай агрэсіі супраць Украіны», — напісаў Генштаб ЗСУ.