У Мінску банкрутуе вытворца салодкасцяў

• 16.09.2025, 10:23

Што пра яго вядома.

У Мінску банкрутуе кампанія «Альтарына», вынікае з даных Адзінага дзяржаўнага рэестра звестак аб банкруцтве.

Кампанія пачала працэдуру ліквідацыі ў красавіку гэтага года. У працэсе высветлілася, што яе сродкаў недастаткова, каб разлічыцца па даўгах. Даўгоў назапасілася амаль 293,6 тыс. рублёў. У жніўні Эканамічны суд Мінска па заяве саміх уладальнікаў фірмы пачаў разглядаць справу аб банкруцтве.

Суд адкрыў конкурсную вытворчасць. Гэта працэдура эканамічнай неплацежаздольнасці. Яе праводзяць для таго, каб задаволіць патрабаванні крэдытораў, абараніць правы даўжніка, а таксама крэдытораў пры санацыі (аздараўленні). Калі правесці санацыю немагчыма або адсутнічаюць для яе падставы, то запускаецца ліквідацыйная вытворчасць даўжніка.

«Альтарына» з красавіка 2019 года займалася вытворчасцю салодкасцяў.