Трамп заявіў пра новы ўдар па судне з Венесуэлы

• 16.09.2025, 9:57

Аперацыі могуць пачацца і на сушы.

Прэзідэнт ЗША Дональд Трамп заявіў, што 15 верасня амерыканскія вайскоўцы нанеслі ўдар па катэры венесуэльскага наркакартэля, які накіроўваўся ў ЗША. Гэта ўжо другі падобны ўдар па меркаваным судне з наркотыкамі за апошнія тыдні, піша Reuters.

Трамп паведаміў, што ў выніку атакі загінулі тры чалавекі, дадаўшы, што ўдар адбыўся ў міжнародных водах.

«Сёння раніцай па маім загадзе Узброеныя сілы ЗША нанеслі ДРУГІ кінетычны ўдар па дакладна ідэнтыфікаваных, надзвычай жорсткіх наркакартэлях і наркатэрарыстах у зоне адказнасці SOUTHCOM», — заявіў Трамп у паведамленні ў Truth Social.

«Гэтыя надзвычай жорсткія наркакартэлі ПРАДСТАЎЛЯЮЦЬ ПАГРОЗУ нацыянальнай бяспецы ЗША, знешняй палітыцы і жыццёва важным інтарэсам ЗША», — заявіў Трамп.

Паўднёвае камандаванне Узброеных сіл ЗША (SOUTHCOM) ахоплівае 31 краіну Паўднёвай і Цэнтральнай Амерыкі, а таксама Карыбскага басейна.

У допіс таксама было ўключана амаль 30-секунднае відэа з паметкай «Несакрэтна», на якім бачна, як, відавочна, судна на вадзе выбухае, а потым узгараецца.

Пазней Трамп заявіў, што ЗША маюць доказы перавозкі наркотыкаў на судне — «дастаткова толькі зірнуць на груз, які быў раскіданы па ўсім акіяне: вялікія мяшкі з кокаінам і фентанілам».

Міністэрства сувязі Венесуэлы пакуль не адрэагавала на просьбу пракаментаваць сітуацыю.

Апошні ўдар быў нанесены на фоне маштабнага нарошчвання ваеннай моцы ЗША ў паўднёвай частцы Карыбскага басейна. 13 верасня пяць амерыканскіх знішчальнікаў F-35 прызямліліся ў Пуэрта-Рыка пасля таго, як адміністрацыя Трампа загадала дзесяці самалётам далучыцца да нарошчвання сіл.

У рэгіёне таксама знаходзяцца як мінімум сем ваенных караблёў ЗША і адна атамная падводная лодка.

Аперацыі могуць правесці і на сушы

Размаўляючы з журналістамі 15 верасня, Трамп дапусціў, што аперацыі супраць меркаваных наркаконтрабандыстаў могуць праводзіцца і на сушы.

«Калі яны прыйдуць па сушы, мы спынім іх так жа, як спынілі караблі, — сказаў Трамп. — Але, магчыма, калі мы трохі пагаворым пра гэта, гэтага не адбудзецца».

Раней у гэтым месяцы міністр абароны ЗША Піт Хегсэт

B> паведаміў маракам і марскім пяхотінцам на вайсковым караблі каля ўзбярэжжа Пуэрта-Рыка, што іх накіравалі ў Карыбскае мора не для навучання, а на «пярэдні край» найважнейшай місіі па барацьбе з наркотыкамі.

15 верасня Хегсэт у допісе ў сацыяльнай сетцы X заявіў пра маштабную місію амерыканскіх вайскоўцаў па барацьбе з наркатаргоўцамі:

«Мы будзем адсочваць іх, забіваць і знішчаць іх сеткі па ўсім нашым паўшар'і — у любы час і ў любым месцы на наш выбар».