Чэхія перакінула ў Польшчу баявыя верталёты
- 16.09.2025, 9:10
Яны ўмацуюць армію ў абароне неба.
У нядзелю, 14 верасня, тры чэшскія верталёты Мі-171Ш прызямліліся на ўсходзе Польшчы. Іх перакінулі з мэтай умацаваць абарону ўсходняга флангу НАТА ў адказ на ўварванне расійскіх дронаў на тэрыторыю Польшчы.
Пра гэта паведамляюць Ceske Noviny.
Паводле звестак чэшскай арміі, верталётнае падраздзяленне будзе дзейнічаць у Польшчы на працягу некалькіх месяцаў, а яго галоўная задача — умацаваць Узброеныя сілы Польшчы ў іх задачах па абароне паветранай прасторы.
Як вядома, Міністэрства абароны Чэхіі прыняло рашэнне аб накіраванні падраздзялення ў сераду ўвечары.
«Праз тры дні адзін з верталётаў правёў разведку месца дыслакацыі падраздзялення. У нядзелю тры верталёты выляцелі ў Польшчу. Яны прыбылі ў пункт прызначэння сёння ўдзень», — паведамілі ў арміі.
Паводле слоў камандуючага Аператыўным камандаваннем чэшскай арміі Вацлава Влчэка, прысутнасць верталётнага падраздзялення ў Польшчы з’яўляецца важным крокам у межах супрацоўніцтва Альянсу.
«І гэта пацвярджае гатоўнасць Чэхіі актыўна садзейнічаць забеспячэнню бяспекі ў рэгіёне», — дадаў ён.
Раней Мінабароны Чэхіі заяўляла, што верталёты дапамогуць польскай арміі абараняць краіны ад нізкалётных беспілотнікаў.
Акрамя таго, кіраўніца Мінабароны Яна Чэрнахова заявіла ў нядзелю, што чакаецца накіраванне да 150 чэшскіх вайскоўцаў на тэрмін да трох месяцаў. У панядзелак яна сказала наступнае:
«Мы выконваем абяцанне, дадзенае нашаму бліжэйшаму саюзніку. Нашы вайскоўцы ўжо знаходзяцца ў Польшчы і гатовыя ўзяць удзел у ўмацаванні абароны паветранай прасторы на ўсходняй мяжы краіны», — сказала Чэрнахова.
Ceske Noviny адзначылі, што разгортванне войскаў стала магчымым дзякуючы дзеючаму мандату на выкарыстанне сіл і сродкаў Мінабароны Чэхіі на 2025 і 2026 гады, які ўхваліў парламент летась.
Гэты мандат прадугледжвае ўмацаванне абароны ўсходняй мяжы НАТА, дзе могуць дзейнічаць да 2000 чэшскіх вайскоўцаў. Зараз войскі Чэхіі дзейнічаюць у межах мандата ў Славакіі, Літве і Латвіі.