«Вушы вянуць»: беларусы паставілі расіянку на месца

• 16.09.2025, 8:13

Расіянка напісала, як пасля трох месяцаў у Беларусі вярнулася ў РФ і ўзрадавалася «чыстай рускай мове».

Мастачка і даследчыца Аліна, якая «праводзіць энергіі праз інтуітыўныя карціны» і рыхтуе праект «па раскрыцці сілы жанчыны праз архетыпы», расказала ў сацсетцы Threads, як пасля трох месяцаў жыцця ў Беларусі вярнулася на радзіму і была рада «зноў чуць чыстую рускую мову». У каментарыях, як і чакалася, разгарэлася лінгвістычная спрэчка.

Пост прыцягнуў значную ўвагу як расійскай, так і беларускай аўдыторыі, сабраўшы менш чым за суткі больш за 400 каментарыяў. Пакуль адны сцвярджалі, што беларусы размаўляюць па-руску граматней, чым расіяне, іншыя крытыкавалі аўтарку, якая, магчыма, і не хацела нікога пакрыўдзіць, але ўсё ж пакрыўдзіла.

«Было б значна лепей, каб у Беларусі ўвогуле ўсе гутарылі на мове», — падкрэсліў карыстальнік sergeve.

«У Беларусі даволі чыстае маўленне. Са сваімі прыемнымі ўстаўкамі кшталту «добра». Мне заўсёды вельмі падабалася, а беларуская мова наогул — проста сэкс. Беларусь — топчык», — падтрымаў dmitry_batuhtins.

«Расіяне, якія самі не ведаюць сваёй мовы, прыедуць нас ёй вучыць, ну вялікі дзякуй», — здзівіўся 21baba_jaga.

«А з чаго вы ўзялі, што ў Расіі чыстая руская мова? Вельмі часта чую, як гавораць рускія, — вушы вянуць», — пацікавілася падпісчыца з нікам elegant_life_upgrades.

«Пад чыста рускай мовай я маю на ўвазе: рускую без акцэнту, у звыклай манеры.

У Беларусі хоць і гавораць па-руску, але па-свойму, і гэта адрозніваецца», — адказала аўтарка поста.

«Больш смешнага і высокапампезнага выказвання пра «чыстую рускую мову ў Расіі» чуць не даводзілася. У Беларусі, Казахстане, Украіне, Малдове якраз граматная руская мова. Так, бывае чуваць гавор, але ў цэлым маўленне граматнае. А вось расіяне, што шастаюць у Беларусь, дзівяць безграматнасцю і акцэнтамі ў рускай мове», — адзначыў іншы карыстальнік.

«Спадзяюся, вы больш не прыедзеце», — выказаў надзею mikita__kurocka.