Зяленскі: Расія рабіла стаўку на паліўны крызіс ва Украіне, але цяпер у яе дэфіцыт бензіну

• 16.09.2025, 2:05

Прэзідэнт Украіны правёў сустрэчу з работнікамі нафтавай, газавай і нафтаперапрацоўчай прамысловасці.

РФ паветранымі атакамі па Украіне хацела справакаваць паліўны крызіс, але замест гэтага Расія сама сутыкнулася з дэфіцытам бензіну. Пра гэта 15 верасня на сустрэчы з работнікамі нафтавай, газавай і нафтаперапрацоўчай прамысловасці заявіў прэзідэнт Украіны Уладзімір Зяленскі.

Відэазапіс апублікаваны на яго старонцы ў Facebook.

Зяленскі павіншаваў усіх работнікаў нафтавай галіны з прафесійным святам.

Ён адзначыў, што, нягледзячы на абстрэлы, «украінская здабыча газу ёсць».

«Я ўдзячны за гэта вам, ад усіх украінцаў. Транспартаванне, захоўванне — усё гэта ёсць. Некалькі зім мы дапамагалі перажыць нашым суседзям у Малдове, і гэта вельмі важна. Нягледзячы на ўсе пагрозы і расійскія ўдары Украіна знайшла спосаб забяспечыць сябе палівам. Расія рабіла стаўку на крызіс, паліўны крызіс ва Украіне, але цяпер дэфіцыт бензіну ў яе», — падкрэсліў Зяленскі.

Паводле яго, расіяне з пачатку поўнамаштабнай вайны супраць Украіны спрабуюць ператварыць кожную зіму ў зброю супраць украінцаў, супраць энергасістэмы і цеплазабеспячэння краіны.