Польшча ўзняла авіяцыю і закрыла аэрапорт Любліна

• 13.09.2025, 18:56

З-за расійскіх дронаў над Украінай.

Польшча ўзняла ў неба сваю авіяцыю з-за дронаў РФ над Украінай. Гэта адбылося ў суботу ўвечары, 13 верасня,

Пра гэта паведамляе Аператыўнае камандаванне Узброеных Сіл Польшчы ў сацсетцы Х .

«Увага, у сувязі з пагрозай удараў беспілотных лятальных апаратаў у рэгіёнах Украіны, якія мяжуюць з Рэспублікай Польшча, у нашай паветранай прасторы пачаліся аперацыі ваеннай авіяцыі», — гаворыцца ў публікацыі.

У камандаванні адзначылі, што з мэтай забеспячэння бяспекі запушчаны ўсе працэдуры. У прыватнасці, у паветранай прасторы краіны дзейнічаюць польскія і саюзніцкія паветраныя судны, а наземныя сістэмы супрацьпаветранай абароны і радыёлакацыйнай разведкі знаходзяцца ў стане вышэйшай гатоўнасці.

«Гэтыя дзеянні носяць прэвентыўны характар і накіраваныя на забеспячэнне бяспекі паветранай прасторы і абарону грамадзян, асабліва ў раёнах, прылеглых да зоны небяспекі», — сказана ў допісе.

Падсумоўваючы, у Аператыўным камандаванні Узброеных Сіл Польшчы дадалі, што адсочваюць бягучую сітуацыю, а падпарадкаваныя сілы і сродкі знаходзяцца ў поўнай гатоўнасці да неадкладнага рэагавання.

Тым часам прэм’ер-міністр Польшчы Дональд Туск таксама пацвердзіў, што з-за расійскіх дронаў паблізу Польшчы ў краіне пачаліся прэвентыўныя аперацыі польскай і саюзніцкай авіяцыі.

«Наземныя сілы супрацьпаветранай абароны прыведзены ў стан падвышанай баявой гатоўнасці», — напісаў ён.

Заўважым, што сёння ўдзень беспілотнікі расійскіх акупантаў фіксаваліся ў шэрагу заходніх абласцей Украіны, у выніку чаго была абвешчана трывога. Паводле стану на цяпер трывога працягваецца ў Валынскай вобласці.

Акрамя таго, цяпер шэраг маніторынгавых каналаў паведамляюць, што расійскі дрон заляцеў на тэрыторыю Румыніі. Аднак афіцыйнага пацверджання гэтаму няма.