У расійскіх «Кінжалаў» знізілася дакладнасць трапляння

• 12.09.2025, 22:39

Прычына вядомая.

У 2025 годзе расійскія ракеты сталі радзей трапляць у запланаваныя РФ мэты ва Украіне з-за ўзмацнення сістэм радыёэлектроннай барацьбы (РЭБ). Пра гэта 12 верасня паведамляе УНН са спасылкай на крыніцу ў Генеральным штабе Узброеных Сіл Украіны.

Суразмоўца журналістаў адзначыў, што ўкраінскія сродкі РЭБ аказваюць уплыў на большасць расійскіх ракет і прывёў прыклад з аэрабалістычнымі ракетамі «Кінжал», якія складана збіваць.

«Ёсць статыстыка, куды трапляюць ракеты «Кінжал». Яны трапляюць не туды, прынамсі сёлета. Трапляюць у поле, лес, лакацыйна губляюцца. «Кінжал» — гэта вельмі дорага [для ворага]», — патлумачыў ён.

Прадстаўнік Генштаба Узброеных Сіл Украіны адзначыў, што чым хутчэй рухаецца «Кінжал», тым больш ракета ўразлівая да ўплыву радыёперашкод.

«Таму праводзілі пэўныя мерапрыемствы, колькасць сродкаў РЭБ была павялічана. І, адпаведна, эфектыўнасць барацьбы супраць «Кінжалаў» стала вышэй», — паведаміў ён.

Суразмоўца агенцтва падкрэсліў, што ўплыў РЭБ залежыць, у прыватнасці, ад раёна размяшчэння сродкаў радыёэлектроннай барацьбы.