«Камунарка» выпусціла цукеркі з асаблівымі словамі

• 12.09.2025, 20:51

Фабрыка размясціла на прысмаках «родныя словы».

Беларуская кандытарская фабрыка «Камунарка» выпусціла цукеркі з асаблівымі словамі, паведамілі на прадпрыемстве.

Цукеркавую навінку прэзентавалі напярэдадні святкавання Дня горада Мінска. Так, у інтэрнаце №1 дзяржаўнага прадпрыемства «Мінскі метрапалітэн» адбылася акцыя «Любімы сэрцам горад мой». Усе яе ўдзельнікі атрымалі новыя цукеркі ад «Камунаркі» з асаблівымі словамі.

Шакаладныя цукеркі-навінкі — глазіраваныя з арахісам і сліўкамі, выпусцілі пад брэндам «Родныя словы». Іх адрознівае ўнікальны дызайн упакоўкі. Абгортка цукерак выпушчаная ў некалькіх колерах, упрыгожаная нацыянальнай сімволікай і «роднымі словамі на беларускай мове»: пяшчота, удзячнасць, ціхамірнасць, натхненне, ветлівасць.

«Родныя словы»: пачастунак з гісторыяй і душой! Навінка напоўненая любоўю да Беларусі. «Родныя словы» — гэта пачастунак з асаблівым сэнсам, — адзначылі на прадпрыемстве.