Зніклы ў Польшчы юнак знайшоўся ва Украіне і звярнуўся да землякоў

• 12.09.2025, 20:08

Ён уступіў у шэрагі 25-й брыгады Дэсантна-штурмавых войскаў ЗСУ.

Ва Украіне знайшлі 18-гадовага паляка Войцэха Антоні, які знік на пачатку сакавіка. Ён уступіў у шэрагі 25-й брыгады Дэсантна-штурмавых войскаў ЗСУ, перадае Onet.

Адзначаецца, што пра знікненне Войцэха паведамілі ў сярэдзіне сакавіка, тады ён мусіў ехаць у Варшаву. Сям’я ўжо падазравала, што хлопец можа накіроўвацца ў Літву або Украіну. Пасля некалькіх дзён пошукаў пазнанская паліцыя абвясціла, што яго знайшлі, не раскрываючы ніякіх падрабязнасцяў.

Цяпер Украінскі цэнтр вербоўкі замежных вайскоўцаў апублікаваў відэа з ім. Паводле слоў юнака, у шэрагі ЗСУ ён уступіў, каб «ратаваць людзей, абараняць іх ад расійскіх захопнікаў, змагацца з расійскім уварваннем і змагацца за Еўропу».

«Для Польшчы вельмі важна, каб Украіна змагалася з расіянамі, бо мы наступныя на перадавой... Браты і сёстры з Польшчы. Вайна бліжэй, чым здаецца. Дапамажыце. Будзьце гатовыя абараняць сваю радзіму. Слава Украіне. Польшча яшчэ не загінула», — кажа Войцэх на відэа.