ЗША заклікалі ЕС і G7 увесці мыты супраць Кітая і Індыі з-за расійскай нафты

• 12.09.2025, 18:09

Каб Пекін і Нью-Дэлі спынілі закупляць расійскую нафту.

ЗША заклікалі Еўрасаюз і чальцоў «Вялікай сямёркі» ўвесці «істотныя тарыфы» на імпарт з Кітая і Індыі, каб яны спынілі закупляць расійскую нафту, а таксама склікалі экстраную фінансавую нараду G7 для абмеркавання мер па ўзмацненні ціску на Расію, паведамляе Reuters.

Кітай і Індыя з'яўляюцца найбуйнейшымі пакупнікамі расійскай нафты. Прадстаўнік амерыканскага Мінфіна ў каментарыі агенцтву заявіў, што гэтыя закупы «фінансуюць ваенную машыну», падаўжаючы вайну ва Украіне. «Раней на гэтым тыдні мы далі зразумець нашым саюзнікам у ЕС, што калі яны сур'ёзна настроеныя спыніць вайну ў сябе на заднім двары, яны павінны далучыцца да нас і ўвесці істотныя тарыфы, якія будуць скасаваныя ў дзень заканчэння вайны», — сказаў ён.

Да гэтага The Wall Street Journal і Financial Times пісалі, што Вашынгтон патрабуе ад еўрапейскіх краін, каб тыя ўвялі мыты ў дачыненні да Індыі і Кітая для ўзмацнення ціску на Расію. Крыніцы FT паведамлялі, што ЗША заклічуць зрабіць гэта і краіны G7.

ЗША ў канцы жніўня ўвялі дадатковыя 25-працэнтныя мыты на тавары з Індыі, такім чынам павялічыўшы стаўку для Нью-Дэлі да 50%. Індыя палічыла абмежаванні несправядлівымі і вырашыла працягнуць закупы расійскай нафты насуперак патрабаванням ЗША. Індыйскі міністр нафты і прыроднага газу Хардып Пуры адзначаў, што пастаўкі расійскай нафты дапамаглі абараніць сусветную эканоміку ад скачка цэн.