Экс-прэзідэнта Бразіліі адправілі ў турму на 27 гадоў
- 12.09.2025, 10:26
За спробу дзяржаўнага перавароту.
Вярхоўны суд Бразіліі прысудзіў былому прэзідэнту краіны Жаіру Балсанару 27 гадоў зняволення за спробу адмяніць вынікі прэзідэнцкіх выбараў 2022 года і спробу забойства абранага прэзідэнта Лулы да Сілвы.
Пра гэта паведамляе Reuters.
Чатыры з пяці суддзяў калегіі Вярхоўнага суда Бразіліі прагаласавалі за асуджэнне Балсанару па ўсіх пяці абвінавачаннях у справе і прызначылі яму пакаранне ў выглядзе 27 гадоў і трох месяцаў зняволення.
Палітык прызнаны вінаватым у планаванні дзяржаўнага перавароту, удзеле ў узброенай злачыннай арганізацыі, спробе сілай звяргнуць дэмакратычны лад Бразіліі, учыненні насільніцкіх дзеянняў супраць дзяржаўных інстытутаў і пашкоджанні дзяржаўнай маёмасці падчас штурму ўрадавых будынкаў яго прыхільнікамі 8 студзеня 2023 года.
Паводле версіі пракурораў, часткай змовы прадугледжвалася магчымасць выкарыстання выбухоўкі, ваеннай зброі або атруты для забойства левага прэзідэнта Луіса Інасіу Лулы да Сілвы, яго віцэ-прэзідэнта Жэралду Алкміна і суддзі Вярхоўнага суда Аляксандра дэ Мараэса, які кіраваў судовым працэсам над Балсанару.
Сутнасць абвінавачанняў
Асноўныя доказы супраць Балсанару датычыліся яго спроб застацца пры ўладзе пасля паразы на прэзідэнцкіх выбарах 2022 года на карысць Лулы да Сілвы.
Федэральная паліцыя заявіла, што палітык быў «цалкам праінфармаваны» пра намеры адмяніць вынікі выбараў, пра ціск на армію дзеля ўмяшання і нават пра стварэнне паралельнага «офісу кіравання крызісамі» для кіравання ўрадам.
Пракуроры сцвярджалі, што змова пачалася яшчэ ў 2021 годзе, каб падарваць давер грамадскасці да выбарчай сістэмы.
Пасля паразы Балсанару на выбарах 2022 года абвінавачаныя спрабавалі адмяніць вынікі, прымушаючы прыхільнікаў палітыка выходзіць на вуліцы Бразіліа, дзе яны штурмавалі і здзяйснялі вандалізм у трох урадавых будынках 8 студзеня 2023 года.
Мараэс, які ў аўторак першым падтрымаў абвінавачванне, заявіў, што абвінавачаныя «здзейснілі ўсе крымінальныя злачынствы, інкрымінаваныя Генеральнай пракуратурай». Суддзі Флавіу Дзіна, Кармэн Лусія і Крысціяну Занін падтрымалі вердыкт адносна Балсанару.
Адвакаты абароны яшчэ могуць падаць апеляцыі, аднак пасля іх вычарпання рашэнне становіцца канчатковым, і любыя турэмныя тэрміны могуць быць выкананыя.
70-гадовы Балсанару і іншыя абвінавачаныя адмаўлялі любыя правапарушэнні і называлі ўвесь судовы працэс палітычным пераследам.