Беларусь уводзіць ліцэнзаванне імпарту акумулятараў

• 12.09.2025, 10:13

Так вырашыў Саўмін.

Беларусь уводзіць ліцэнзаванне імпарту акумулятараў. Гэта прадугледжана пастановай Саўміна, якая 12 верасня была апублікавана на Нацыянальным прававым інтэрнэт-партале.

Новыя правілы закранаюць электрычныя свінцовыя акумулятары, якія выкарыстоўваюцца для запуску поршневых рухавікоў, што працуюць з вадкім электралітам, масай больш за 5 кг, для прамысловай зборкі, а таксама іншыя электрычныя свінцовыя акумулятары, што працуюць з вадкім электралітам, масай больш за 5 кг.

Для іх імпарту неабходна будзе атрымаць разавую ліцэнзію. Яе выдае Міністэрства антыманапольнага рэгулявання і гандлю па ўзгадненні з Міністэрствам прамысловасці.

Правіла не распаўсюджваецца на тавары, што перамяшчаюцца ў рамках міжнародных транзітных перавозак, якія пачынаюцца і заканчваюцца за межамі Рэспублікі Беларусь, паходзяць з дзяржаў — членаў ЕАЭС пры ўмове пацвярджэння іх паходжання сертыфікатам або ўключаныя ў Еўразійскі рэестр прамысловых тавараў краін ЕАЭС, а таксама ўвозімыя ў якасці замежнай безвыплатнай дапамогі.

Пасля афіцыйнага апублікавання пастановы ліцэнзаванне будзе дзейнічаць сем месяцаў, а асноўныя палажэнні дакумента ўступяць у сілу праз месяц пасля яго публікацыі.