FT: ЗША ўзмоцняць ціск на Індыю і Кітай за фінансаванне ваеннай машыны Пуціна
- 12.09.2025, 8:21
Гэта павінна схіліць Маскву да перамоваў з Украінай.
ЗША заклікаюць краіны G7 прымусіць Індыю і Кітай увесці павышаныя тарыфы на закуп расійскай нафты. Гэта павінна схіліць Маскву да перамоваў з Украінай.
Пра гэта паведамляе Financial Times.
Адзначаецца, што ў пятніцу падчас відэазванка, міністры фінансаў краін «Групы сямі» (G7) вядучых эканомік абмяркуюць прапанову ЗША па новым пакеце мер, пакуль Дональд Трамп актывізуе намаганні па заключэнні мірнага пагаднення ва Украіне.
На гэтым тыдні прэзідэнт ЗША заклікаў ЕС увесці тарыфы да 100% супраць Індыі і Кітая, аднак цяпер пашырае ініцыятыву на саюзнікаў па G7.
Прадстаўнік Мінфіна ЗША заявіў, што «закупы з боку Кітая і Індыі расійскай нафты фінансуюць ваенную машыну Пуціна і працягваюць бяссэнсоўнае забойства украінскага народа».
«На пачатку гэтага тыдня мы выразна далі зразумець нашым еўрапейскім саюзнікам, што калі яны сур'ёзна настроеныя пакласці канец вайне ў сваім рэгіёне, то павінны далучыцца да нас і ўвесці высокія тарыфы, якія будуць скасаваныя ў дзень заканчэння вайны», - сказаў ён.
Прадстаўнік амерыканскага Мінфіна дадаў, што «адміністрацыя міру і росквіту прэзідэнта Трампа гатовая, і нашым партнёрам па G7 трэба дзейнічаць разам з намі».
Пры гэтым ён адмовіўся назваць канкрэтны памер запланаваных тарыфаў, але знаёмыя з сітуацыяй крыніцы FT адзначылі, што ЗША прапаноўвалі ўзровень паміж 50% і 100%.
З Кітаем усё складана
FT нагадала, што ў жніўні ЗША павысілі тарыфы на імпарт з Індыі да 50% з-за закупак расійскай нафты. У красавіку Трамп рэзка падняў тарыфы на імпарт з Кітая, але ў маі знізіў іх пасля моцнага адваротнага рыначнага эфекту.
Прадстаўнікі ЕС разумеюць, што ўвесці такія высокія тарыфы супраць двух ключавых гандлёвых партнёраў будзе складана з-за эканамічных наступстваў і верагоднай рэакцыі з боку Пекіна.
Усё ж такі Брусэль спадзяецца на працягу некалькіх тыдняў заключыць гандлёвае пагадненне з Нью-Дэлі, імкнучыся ўсталяваць больш цесныя сувязі з Індыяй.
ЕС спадзяецца пераканаць ЗША, што можна дасягнуць падобнага ціску і іншымі мерамі, такімі як больш жорсткія санкцыі супраць расійскіх энергетычных вытворцаў і перанос на 2027 год тэрміну, да якога дзяржавы-члены Садружнасці павінны спыніць закупкі расійскай нафты і газу.
Паводле слоў трох еўрапейскіх чыноўнікаў, такім чынам Трампа спрабуюць схіліць да ціску на Венгрыю і Славакію - дзве краіны з прарасійскімі лідарамі, якія працягваюць купляць расійскую нафту і раней накладалі вета на больш жорсткія санкцыі ЕС.
У той жа час у FT адзначылі, што Брусэль ужо абмяркоўвае верагоднасць увядзення санкцый супраць Кітая за закупку таннай расійскай нафты і газу.
Звадкаваны газ і Канада
Камісар ЕС па энергетыцы Дан Ёргенсэн у чацвер правёў сустрэчу з міністрам энергетыкі ЗША Крысам Райтам, падчас якой абмеркаваў замену расійскага звадкаванага прыроднага газу амерыканскім.
«Нам варта як мага хутчэй пазбавіцца ад залежнасці, якую мы дагэтуль маем... ад расійскіх энергетычных рэсурсаў», - сказаў ён.
ЕС дагэтуль купляе каля пятай часткі свайго газу ў Расіі, тады як да поўнамаштабнага ўварвання ва Украіну ў 2022 годзе гэтая доля складала 45%.
Канада, якая старшынюе ў G7 і прымала апошні саміт групы ў Альберце ў чэрвені, паведаміла, што склікала сустрэчу «пасля абмеркаванняў з ЗША».
Яна заявіла, што на сустрэчы «будуць абмяркоўвацца далейшыя меры па ўзмацненні ціску на Расію і абмежаванні яе ваеннай машыны».
«G7 рашуча выступае супраць незаконнай і беспадстаўнай вайны Расіі», - заявіў прадстаўнік міністра фінансаў Канады Джон Фрагос.
Чыноўнік урада Канады на ўмовах ананімнасці паведаміў выданню, што перамовы будуць уключаць прапановы па «тарыфах для краін, якія працягваюць фінансаваць ваенную машыну Расіі».
FT адзначыла, што Атава таксама сутыкаецца з дылемай з-за такога кроку.
У чэрвені прэм'ер-міністр Канады Марк Карні распачаў працэс аднаўлення адносін з Індыяй пасля двухгадовага разрыву.
Падобныя крокі былі зроблены і ў кірунку Пекіна, паколькі Канада дыверсіфікуе сваю эканоміку, аслабляючы залежнасць ад ЗША.
«Энергетычныя» санкцыі Трампа
У ліпені прэзідэнт ЗША Дональд Трамп не выключыў увядзення 100% другасных санкцый у дачыненні да краін, якія купляюць расійскія энергарэсурсы.
Абмежаванні павінны былі ўступіць у сілу, калі расійскі дыктатар Уладзімір Пуцін адмовіцца ад мірнага пагаднення з Украінай.