Сабаленка паабяцала разграміць скандальнага аўстралійца Кірыёса

• 11.09.2025, 21:04

Беларуска эпатажна падгравае цікавасць да «Бітвы палоў».

Беларуская тэнісістка Арына Сабаленка заявіла пра намер перамагчы аўстралійца Ніка Кірыёса у маючым адбыцца паказальным паядынку.

У падкасце Джэя Шэці наша суайчынніца ў жартоўнай форме паабяцала ўчыніць суперніку разгром.

Акрамя таго, найлепшая тэнісістка свету прызналася, што адчувае ціск перад незвычайным матчам.

«Мне цікава згуляць супраць мужчыны. Я гатовая надраць яму... дупу. Цяпер ён аказвае на мяне вялікі ціск, таму спадзяюся, што Нік проста здымецца», – сказала Сабаленка.

З падобнымі выказваннямі першая ракетка свету таксама наўпрост звярнулася да Кірыёса.

«Нік, табе лепш быць гатовым. Я збіраюся надраць табе дупу, чувак», – дадала Арына.

Паводле слоў Сабаленкі, ATP можа паставіцца да гэтага матчу асцярожна. Арына таксама іранічна заўважыла, што магла б згуляць з кімсьці мацнейшым.

«Окей, хай гэта будзе Сінер або Алькарас, але толькі не Нік», – закончыла сваю думку беларуска.

Чакаецца, што сустрэча паміж нашай суайчынніцай і аўстралійцам адбудзецца ў Ганконгу бліжэй да канца 2025 года.

Фармат матчу будзе незвычайным. Сабаленка згуляе на скарочанай палове корта, што павінна ўраўнаваць сілы з Кірыёсам.