Мікалай Статкевіч вярнуўся ў Беларусь

• 11.09.2025, 19:36

Лідар беларускай апазіцыі адмовіўся заставацца ў Літве.

Лідар беларускай апазіцыі Мікалай Статкевіч адмовіўся вяртацца ў Літву, гэта LRT.lt пацвердзілі ў Службе аховы дзяржаўнай мяжы (VSAT).

Палітык у турэмнай робе доўга знаходзіўся ў нейтральнай зоне паміж Беларуссю і Літвой.

Пазней літоўскія памежнікі зафіксавалі, што палітвязень пайшоў назад у глыб тэрыторыі Беларусі.

«Ён знаходзіўся на тым баку і ў Літву не пераходзіў, спроб перайсці мяжу не было. Зараз яго ўжо няма, бо ён выдаліўся ў глыб пункта», — сказаў прадстаўнік VSAT Гедрус Мішуціс.

Ён таксама абверг інфармацыю, што з'явілася ў сацсетках, пра тое, што такіх беларускіх зняволеных, якія адмовіліся, было больш. На пытанне, ці пайшоў мужчына па ўласнай волі, Мішуціс адзначыў, што яго суправаджалі некалькі беларускіх службоўцаў, але ён ішоў сам.

Нагадаем, экс-кандыдат у прэзідэнты быў арыштаваны яшчэ да выбараў 2020 года. Яго 2 гады і 7 месяцаў трымалі ў рэжыме інкамунікада ў турме Глыбокага.