Вызвалены блогер Ігар Лосік

• 11.09.2025, 16:56

Ён знаходзіўся ў зняволенні з чэрвеня 2020 года.

На волю выйшаў блогер, супрацоўнік «Радыё Свабода» Ігар Лосік. Пра гэта паведамляе праваабарончы цэнтр «Вясна».

Ён знаходзіўся ў зняволенні з чэрвеня 2020 года. У снежні 2021 года Гомельскі абласны суд прысудзіў яго да 15 гадоў калоніі па «справе Ціханоўскага». Блогеру інкрымінавалі распальванне варожасці (частка 3 артыкула 130 КК) і арганізацыю масавых беспарадкаў (частка 1 артыкула 293 КК). У зняволенні ён абвяшчаў галадоўку і спрабаваў скончыць жыццё самагубствам.

Тэрмін Ігар адбываў у ІК-1 у Наваполацку. Некалькі разоў яго адпраўлялі ў штрафны ізалятар і памяшканне камернага тыпу.

Рэжым Лукашэнкі вызваліў 52 вязняў сумлення. Сайт Charter97.org аператыўна абнаўляе спіс тых, хто выйшаў на волю.