Албанія прызначыла першага ў свеце «лічбавага міністра»

• 11.09.2025, 16:56

ШІ Дыелла стане «слугай публічных тэндараў».

Албанія стала першай краінай у свеце, дзе міністрам прызначаны не чалавек, а штучны інтэлект. Новы віртуальны чыноўнік атрымаў імя Дыелла (у перакладзе з албанскай — «сонечнае святло») і будзе адказваць за сферу дзяржаўных закупак, абвясціў прэм’ер-міністр краіны Эдзі Рама, піша Politico (пераклад — сайт Charter97.org).

Паводле яго слоў, Дыелла стане «слугай публічных тэндараў» і забяспечыць поўную празрыстасць працэдур. Рама падкрэсліў, што цяпер рашэнні па тэндэрах будуць прымацца «па-за міністэрствамі», а працэс стане «на 100% некарумпаваным і абсалютна празрыстым».

Дыелла ўжо знаёмая з грамадзянамі праз платформу e-Albania, якая аб’ядноўвае лічбавыя дзяржаўныя паслугі. У яе ёсць уласны аватар — маладой жанчыны ў нацыянальным адзенні. Штучны інтэлект будзе ацэньваць тэндарныя заяўкі і зможа «наймаць таленты з усяго свету», што, паводле слоў прэм’ера, дапаможа разбурыць бюракратычныя бар’еры і прадузятасць у дзяржаўных структурах.

Прызначэнне звязана з шматгадовымі праблемамі Албаніі ў сферы карупцыі, асабліва ў дзяржаўных закупках. Гэтае пытанне неаднаразова ўзнімалася Еўрасаюзам у штогадовых справаздачах аб вяршэнстве права.

Рама, які ў маі 2025 года выіграў гістарычны чацвёрты мандат, паабяцаў, што лічбавыя рэформы дапамогуць краіне дасягнуць мэты — уступіць у ЕС да 2030 года.

«Гэта не фантастыка, а рэальны абавязак Дыеллы», — заявіў ён, прадстаўляючы першага ў свеце міністра, створанага штучным інтэлектам.