ЕС адказаў на атаку беспілотнікаў РФ на Польшчу

• 11.09.2025, 7:54

Цану для Масквы будуць павышаць.

Еўрапейскі саюз асудзіў наўмыснае парушэнне паветранай прасторы Польшчы расійскімі беспілотнікамі і паабяцаў больш актыўна падтрымліваць Украіну.

Пра гэта заявіла Высокая прадстаўніца ЕС па пытаннях замежных спраў і палітыкі бяспекі Кая Каллас.

Кіраўніца еўрапейскай дыпламатыі назвала атаку беспілотнікаў агрэсіўным і неабдуманым актам і часткай сур'ёзнай эскалацыі з боку Расіі, а таксама пагрозай бяспецы грамадзян ЕС, рэгіянальнай стабільнасці і міжнароднаму міру.

Яна адзначыла, што гэта сур'ёзнае парушэнне еўрапейскай паветранай прасторы «толькі ўмацоўвае нашу рашучасць падтрымліваць Украіну і яе народ у абароне ад Расіі, а таксама ў імкненні да ўсеахопнага, справядлівага і трывалага міру».

«Мы і далей будзем павышаць цану для Масквы, істотна ўзмацняючы санкцыі супраць Расіі і яе саюзнікаў. Мы таксама будзем працаваць з міжнароднымі партнёрамі, каб аказваць ціск на Расію з мэтай спынення гэтай вайны», — гаворыцца ў заяве Каллас.

Яна дадала, што ЕС выказвае поўную салідарнасць з Рэспублікай Польшча, працягвае аказваць ёй неабходную падтрымку для абароны ўсходняй мяжы і знаходзіцца ў пастаянным цесным кантакце з польскімі ўладамі.