У Румыніі ўзялі пад варту экс-намесніка кіраўніка выведкі Малдовы, які шпіёніў на карысць рэжыму Лукашэнкі

• 11.09.2025, 2:00

Аляксандра Балана затрымалі ў Бухарэсце.

Апеляцыйны суд Бухарэста выдаў ордэр на арышт на 30 дзён на імя Аляксандра Балана — былога намесніка кіраўніка выведкі Рэспублікі Малдова, якога абвінавачваюць у разгалошванні сакрэтнай інфармацыі беларускаму КДБ.

Пра гэта паведамляе G4Media.

Балана затрымалі ў Бухарэсце ў аўторак у межах сумесных дзеянняў спецслужбаў Румыніі, Венгрыі і Чэхіі, і яго дапыталі пракуроры Дырэктарата па расследаванні арганізаванай злачыннасці і тэрарызму (DIICOT).

Яму інкрымінуюць разгалошванне сакрэтнай інфармацыі КДБ Беларусі «ў абставінах, што ствараюць пагрозу нацыянальнай бяспецы Румыніі».

Па хадайніцтве DIICOT суд Бухарэста пастанавіў узяць былога намесніка кіраўніка малдаўскай выведкі пад варту на 30 дзён.

Раней у Малдове пацвердзілі затрыманне Балана і абвясцілі аднаго супрацоўніка пасольства Беларусі персонай нон грата.

Нагадаем, 9 верасня Служба бяспекі і інфармацыі (BIS) Чэхіі разам са спецслужбамі Румыніі і Венгрыі заявіла пра ліквідацыю выведвальнай сеткі, створанай КДБ Беларусі ў Еўропе.