Наша рэвалюцыя

• НАТАЛЛЯ РАДЗІНА
• 9.08.2025, 9:41

Толькі так будуецца моцная дэмакратычная дзяржава.

9 жніўня 2020 года ўвайшло ў гісторыю Беларусі як дзень пачатку самых масавых народных выступаў супраць дыктатуры. Нехта называе гэтыя падзеі пратэстамі, я ж па-ранейшаму мяркую, што гэта была рэвалюцыя.

У адрозненне ад большасці сёлетніх палітычных дзеячаў беларускай эміграцыі, я адкрыта знаходжуся ў апазіцыі да Лукашэнкі з 1997 года. У 18 гадоў, яшчэ студэнткай журфака БДУ, пачала працаваць у незалежных медыя і цягам доўгіх гадоў дыктатуры бачыла, як марудна і цяжка мянялася свядомасць людзей у Беларусі. Так, у краіне з моманту прыходу да ўлады дыктатара ў 1994 годзе актыўна дзейнічала палітычная апазіцыя, якая, часта коштам жыцця і свабоды, супрацьстаяла Лукашэнку. Аднак, на жаль, большая частка беларускага грамадства інертна назірала за гэтай няроўнай сутычкай.

І вось, нарэшце, у 2020 годзе ў свядомасці беларускіх грамадзянаў адбыўся доўгачаканы пералом. Большасць людзей згадалі пра годнасць і сваё права мяняць уладу і масава ўключыліся ў барацьбу. Таму гэта – рэвалюцыя, якая змяніла менталітэт і самасвядомасць усяго народа. Пра Беларусь загаварыў свет.

Так, мы не перамаглі. Тысячы людзей апынуліся ў турмах, шмат хто страціў жыцці, сотні тысячаў эмігравалі. Але ўсе гэтыя ахвяры не марныя, таму што толькі так будуецца моцная дэмакратычная дзяржава – праз паўстанні народа, які прагне свабоды.

Так, глыбока расчароўваюць розныя палітыкі і дзеячы, уся гэтая пена, якая ўзнікла на хвалі рэвалюцыі 2020 года. Але ці так гэта дзіўна? Рэвалюцыю робяць рамантыкі, а яе пладамі часта карыстаюцца нягоднікі. Нягледзячы на гэта, заўсёды верце ў сябе і беларусаў, бо менавіта народ – галоўны герой, матор і рухавік тых падзей. Менавіта вы, простыя людзі, рызыкнулі ўсім і выйшлі на пратэсты супраць ненавіснага дыктатара. Менавіта вам – вечная слава і бязмежная павага.

І мінулыя пяць гадоў не зламалі беларусаў. Усё гэта добра разумее Лукашэнка, які хоць і ўтрымаўся ва ўладзе дзякуючы масаваму тэрору, але прадаўжае панічна баяцца ўласнага народа. Усе яны там, службоўцы і генералы, гэбісты і амапаўцы, ведаюць, што пры ўзнікненні першай магчымасці людзі знясуць іх уладу да д'ябла. І схавацца за спінай старых дзедаў Лукашэнкі і Пуціна (дзякуй за (спасибо за цудоўную карцінку з вострава Валаам!) не атрымаецца. Пытанне часу.

Наталля Радзіна, галоўная рэдактарка сайта Charter97.org