Караль Наўроцкі афіцыйна стаў прэзідэнтам Польшчы.

• 6.08.2025, 11:28

Новы кіраўнік польскай дзяржавы прыняў прысягу.

Караль Наўроцкі ўрачыста прыведзены да прысягі на пасаду прэзідэнта Польшчы. 6 жніўня ён афіцыйна стаў прэзідэнтам Польшчы.

Згодна з артыкулам 130 Канстытуцыі Польшчы, прэзідэнт Караль Наўроцкі прамовіў словы прысягі:

- Прымаючы па волі народа пасаду прэзідэнта Польшчы, урачыста клянуся, што буду верны палажэнням Канстытуцыі, буду няўхільна ахоўваць годнасць народа, незалежнасць і бяспеку дзяржавы, а дабрабыт Айчыны і грамадзян заўсёды будуць для мяне найвышэйшай каштоўнасцю.

Прэзідэнт Караль Наўроцкі завяршыў урачыстую прысягу словамі: "Ды дапаможа мне Бог". Такая фармулёўка таксама прадугледжана Канстытуцыяй. Пасля гэтых слоў Караль Наўроцкі афіцыйна ўступіў на пасаду прэзідэнта Польшчы.

Нагадаем, другі тур прэзідэнцкіх выбараў у Польшчы адбыўся 1-га чэрвеня. За крэсла прэзідэнта змагаліся ліберальны кандыдат ад кіруючай "Грамадзянскай кааліцыі", мэр Варшавы Рафал Тшаскоўскі і кіраўнік Інстытута нацыянальнай памяці Польшчы Караль Наўроцкі, якога падтрымлівае апазіцыйная кансерватыўная партыя "Права і справядлівасць". Наўроцкі набраў 50,89% галасоў, Тшаскоўскі - 49,11%.