УСУ адмаўляюцца ад «пікселя»

• 3.08.2025, 20:34

Украінскія вайскоўцы атрымаюць новую форму.

Узброеныя сілы Украіны адмаўляюцца ад камуфляжу ММ-14, які вядомы ў народзе як "піксель". Замест гэтага ўкраінскія вайскоўцы будуць насіць новую форму, піша Militarnyi.

На сайце "Партнёр МАУ" паведамілі, што Цэнтральным упраўленнем развіцця матэрыяльнага забеспячэння быў зацверджаны маскіровачны малюнак "ММ-25". Ён будзе выкарыстоўвацца ў вырабе прадметаў рэчавай маёмасці для ўкраінскіх вайскоўцаў.

У Telegram-канале First Division адзначылі, што "ММ-25" з'яўляецца амаль поўнай копіяй MultiCam, які распрацаваны амерыканскай кампаніяй Crye Precision сумесна з Даследчым цэнтрам вайсковага рыштунку войска ЗША. Амерыканскія вайскоўцы выкарыстоўваюць яго з 2002 года.

Тэрмін пераходу на новую форму пакуль невядомы. Таксама невядома, калі вайскоўцы атрымаюць першыя камплекты.