Побач з расейскім курортам Туапсэ шторм і тарнада знеслі масты і машыны

• 3.08.2025, 14:06

Стыхія стала прычынай апоўзняў і абвалаў.

Штармавы вецер і тарнада разбурылі пляж у пасёлку Агой Краснадарскага краю. Моцны вецер разбушаваўся ў Туапсінскім раёне і ў яго наваколлях. Шторм стаў прычынай апоўзняў і абвалаў, паведамілі расейскія Telegram-каналы.

Так, больш за ўсё пацярпелі мясцовыя жыхары і адпачывальнікі ў наваколлях Туапсэ. З'явілася відэа, дзе на пляжы вецер падняў з мора катамаран, некалькі разоў перавярнуў яго ў паветры і выкінуў на пляж, поўны людзей.

Катамаран з гучным плескачом упаў на дах пляжнага будынка, але нават гэта не прымусіла адпачывальнікаў схавацца – яны прадоўжылі здымаць рэдкую з'яву і назіралі за тым, што адбываецца.

У той самы час у пасёлку Лермантава праз моцныя дажджы ў гарах падняўся ўзровень вады ў рэках – гэта выклікала апоўзні, і плынь вады панелас мост разам з галінамі і зямлёй. За ракой без пераправы засталіся 300 дамоў.

Апоўзень таксама перакрыў платны адрэзак трасы М-4 «Дон» у кірунку Джубгі. На месцы здарэння працуюць экстранныя службы, арганізаваны аб'езд аўтамабіляў праз Новарасійск. Там аўтобус упаў у раку з моста, але ратавальнікі змаглі дастаць усіх 25 чалавек у яго салоне.

«Праз выпадзенне моцных ападкаў адбылося ўзняцце ўзроўню ракі Дэфань. У выніку чаго адбылося падтапленне прыдамавых тэрыторый (колькасць удакладняецца) у трох населеных пунктах: сяло Малдаванаўка, пасёлак Новаміхайлаўскі і сяло Дэфанаўка», – гаворыцца ў паведамленні МНС.

Паводле звестак МНС Расеі, у рэгіёне захоўваецца пагроза дажджу, граду і моцнага ветру.

Праз наступствы стыхіі ў школе пасёлка Новаміхайлаўскага адкрылі пункт часовага размяшчэння для людзей, чые дамы пацярпелі ад непагадзі. Яшчэ адзін паабяцалі пры неабходнасці адкрыць у пасёлку Джубга.

Тым часам на трасе М-4 «Дон» праз сель, які сышоў, паралізаваны рух у кірунку пасёлка Джубга: дарога перакрытая ў абодвух кірунках.