На Камчатцы ўпершыню за 600 гадоў адбылося вывяржэнне вулкана Крашаніннікава

• 3.08.2025, 12:06

На фоне нядаўняга землятрусу і цунамі.

На Камчацкім паўвостраве адбылося вывяржэнне вулкана Крашаніннікава – першае за 600 гадоў.

Пра гэта паведамляе Sky News.

Гэта звязваюць з моцным землятрусам магнітудай 8,8, які адбыўся на Далёкім Усходзе Расеі ў пачатку тыдня.

Паводле звестак Інстытута вулканалогіі і сейсмалогіі, апошняе зафіксаванае вывяржэнне Крашаніннікава адбылося прыкладна ў 1463 годзе.

Кіраўніца Камчацкай групы рэагавання на вывяржэнні вулканаў Вольга Гірына адзначыла, што цяперашняе вывяржэнне – першае пацверджанае гістарычна за шэсць стагоддзяў.

Вывяржэнне адбылося ноччу на фоне ўзмоцненай сейсмічнай актыўнасці ў рэгіёне.

Раней на гэтым тыдні на Камчатцы таксама актывізаваўся вулкан Ключэўскі – самы высокі і адзін з самых актыўных у свеце. Ягонае вывяржэнне назіралі некалькі разоў за апошнія гады.

Акрамя таго, у нядзелю на Курыльскіх астравах зафіксавалі землятрус магнітудай блізу 7 балаў.

Паводле звестак Нямецкага даследчага цэнтра геалагічных навук і Геалагічнай службы ЗША, а таксама Ціхаакіянскай сістэмы папярэджання цунамі, папярэджанняў аб цунамі пасля гэтага землятрусу не было.

У той самы час Міністэрства надзвычайных сітуацыяў Расеі папярэдзіла пра магчымыя хвалі цунамі ў трох раёнах Камчацкага паўвострава пасля нядзельнага землятрусу.

Вывяржэнні вулканаў на Камчатцы і магутныя землятрусы сведчаць пра павышаную сейсмічную актыўнасць рэгіёну, што патрабуе пільнай увагі з боку выратавальных службаў і мясцовых уладаў.