Ці можна беларусам памяняць савецкія дакументы ў Польшчы

• 28.08.2025, 17:41

Адказ чыноўнікаў.

Некаторыя польскія ўжонды (мясцовыя органы ўлады) не прымаюць пасведчання аб нараджэнні савецкага ўзору, хаця раней МУС Польшчы заяўляла, што забароны на гэта няма.

Еўрарадыё спытала ў варшаўскай Управы запісу актаў грамадзянскага стану, ці могуць яны ўсё ж прыняць “зялёную кніжку”.

Там адказалі, што замежныя дакументы могуць быць унесеныя ў рэестр, калі адпавядаюць пэўным умовам: напрыклад, там пацверджана, што ён выдадзены афіцыйным органам, прызнаецца ў роднай краіне і «не выклікае сумненняў у сапраўднасці».

Польскія чыноўнікі ўдакладнілі, што супрацоўнік управы можа запытаць апастыль на дакумент, калі ўзнікаюць сумневы ў яго сапраўднасці. Крытэрый для ацэнкі магчымай (не)сапраўднасці дакументаў не назвалі.

Пры гэтым ва ўправе падкрэслілі, што кожны выпадак разглядаецца індывідуальна.