Расейскі жаўнер, які ваяваў супраць Украіны, уцёк у Нарвегію

• 23.08.2025, 17:51

Ён просіць прытулку ў гэтай краіне.

Расеец, які ваяваў супраць Украіны, уцёк у Нарвегію і папрасіў прытулку. Пра гэта паведаміла мясцовая паліцыя.

Незаконнае перасячэнне мяжы было зафіксаванае 21 жніўня недалёка ад вёскі Грэнсе-Якабсэльв у Фінмарку. Мужчына пераплыў раку Вуарэміекі, якая працякае ўздоўж нарвежска-расейскай мяжы і быў затрыманы нарвежскімі памежнікамі, паведамляе газета Yle.

Паводле звестак праваахоўнікаў, затрыманне прайшло без здарэнняў. Аднак яны заявілі, што не будуць выдаваць падрабязнасці аб затрыманым, зараз ідзе праверка атрыманай ад яго інфармацыі.

У той самы час адвакат затрыманага расейца заявіў, што мужчына ваяваў супраць Украіны. Ён зараз праходзіць стандартную працэдуру атрымання прытулку і ўжо быў дапытаны.

«Ён быў расейскім жаўнерам. Ён быў ва Украіне і прыняў пастанову, што больш не хоча ўдзельнічаць у вайне», - паведаміў праваабаронца.

Справа будзе перададзеная ў іміграцыйны аддзел паліцыі для далейшага расследавання.