Дрон, які ўпаў у Польшчы, магчыма, прыляцеў з Беларусі

• 21.08.2025, 11:31

На абломках БПЛА быў надпіс на карэйскай мове.

Расейскі дрон, які ўпаў 20 жніўня на кукурузнае поле ў ваколіцах Любліна, імаверна, заляцеў з Беларусі.

Пра гэта піша Gazeta Prawna.

Пракурор акруговай пракуратуры ў Любліне Гжэгаж Трусевіч паведаміў, што ў сераду ўдалося дапытаць яшчэ трох жыхароў найбліжэйшых населеных пунктаў, якія бачылі і чулі лятальны аб'ект:

- Існуе вельмі высокая імавернасць таго, што аб'ект, магчыма, прыляцеў з тэрыторыі Беларусі, — падкрэсліў ён.

На абломках дрона, які ўпаў, выяўлены надпіс, як мяркуецца, на карэйскай мове, расказаў пракурор.

Раней міністр нацыянальнай абароны Польшчы Уладзіслаў Касіняк-Камыш назваў падзенне дрона пад Люблінам “расейскай правакацыяй”.