У Ганцавічах суд спагнаў з 14-гадовага самакатчыка сем тысячаў рублёў стратаў

• 20.08.2025, 17:24

Што здарылася?

Суд Ганцавіцкага раёна спагнаў з 14-гадовага падлетка кампенсацыю за наезд на жанчыну на электрасамакаце. Пра гэтую справу расказала прэс-служба Вярхоўнага суда.

Паводле матэрыялаў справы, у сакавіку 2025 года 14-гадовы падлетак не справіўся з кіраваннем электрасамаката і ўчыніў наезд на жанчыну.

У выніку пацярпелая атрымала менш цяжкія цялесныя пашкоджанні, якія прывялі да «доўгага разладу здароўя на тэрмін не большы за 4 месяцы».

Крымінальная справа не пачыналася, бо самакатчык не дасягнуў 16-гадовага ўзросту.

Праз атрыманыя траўмы жанчына не працавала з красавіка да чэрвеня, блізу месяца перамяшчалася на мыліцах і мела патрэбу ў пабочнай дапамозе. Акрамя таго, як вызначыў суд, пры падзенні пашкодзіўся яе мабільны тэлефон, рамонт якога каштаваў 360 рублёў. Агульныя затраты на лячэнне склалі 714,09 рубля. У судзе яна таксама прасіла спагнаць 8000 рублёў у якасці кампенсацыі маральнай шкоды.

У выніку суд пастанавіў спагнаць з падлетка кампенсацыю маральнай шкоды памерам 6000 рублёў і матэрыяльнай шкоды агулам на 1074,09 рубля (рамонт тэлефона і лячэнне). У пастанове асобна агаворваецца, што калі ў няпоўнагадовага няма прыбытку або маёмасці, то шкоду павінны пакрыць яго бацькі ў долевым парадку.

Пастанова суда пачала законнае дзеянне.