Крадзеж стагоддзя ў Дубаі: банда на шыкоўных аўто выкрала дыямент коштам $25 мільёнаў

• 20.08.2025, 8:00

Злодзеі выдавалі сябе за пасярэднікаў патэнцыйнага пакупніка.

У Дубаі паліцыя спыніла дзёрзкае рабаванне, падчас якога быў выкрадзены выключна рэдкі ружовы брыльянт коштам 25 мільёнаў даляраў.

Пра гэта паведамляе CNN.

Злодзеі выдавалі сябе за пасярэднікаў патэнцыйнага пакупніка і змаглі выкрасці каштоўны камень у ювеліра.

Са слоў праваахоўнікаў, дыямент вагой 21,25 карата адрозніваецца выключнай выразнасцю, сіметрыяй і паліроўкай, а таксама мае ўнікальны ўзровень чысціні, што рабіла яго жаданай цэллю для банды, якая рыхтавала рабаванне больш за год.

Са слоў паліцыі, ружовы дыямент з'яўляецца выключна рэдкім.

Банда старанна адсачыла прыбыццё брыльянта з Еўропы ў Дубай і распрацавала складаны план выкрадання. Зламыснікі арандавалі шыкоўныя аўтамабілі, праводзілі сустрэчы ў гатэлях высокага класа і нават нанялі эксперта для праверкі сапраўднасці каменя. Пад выглядам знаёмства з пакупніком яны прывабілі гандляра на вілу, выкралі дыямент і спрабавалі схавацца.

Аднак мясцовая паліцыя хутка высачыла траіх падазраваных, арыштавала іх і вярнула брыльянт да таго, як яго паспелі вывезці кантрабандай з Дубая.

Ювелір, у якога скралі камень, выказаў захапленне хуткасцю рэагавання ўладаў і заклікаў іншых удзельнікаў алмазнага гандлю выконваць афіцыйныя правілы бяспекі.

Дубай у апошнія гады ператварыўся ў адзін з сусветных цэнтраў гандлю дыяментамі, дзякуючы мінімальным падатковым патрабаванням і зручнаму размяшчэнню паміж краінамі-вытворцамі ў Афрыцы і асноўнымі рынкамі збыту, такімі як Індыя.