Маладымі беларускімі футбалістамі зацікавіліся клубы з Італіі, Партугаліі і Бельгіі

• 19.08.2025, 20:41

Адразу два гульцы з нашай краіны патрапілі на радары клубаў топавых чэмпіянатаў.

Беларускі нападнік Ілля Губарэвіч паспрабуе замацавацца ў партугальскай «Браге».

Як паведамляе журналіст Тарас Шчыры, 18-гадовы футбаліст пройдзе трэніровачны збор з юнацкай і маладзёвай камандамі клуба.

Губарэвіч з'яўляецца выхаванцам магілёўскага «Дняпра».

У 2023 годзе ён перайшоў у акадэмію АБФФ, дзе ў гэтым сезоне правёў 18 матчаў за яе каманду ў Першай лізе, забіў 11 галоў і аддаў дзве галявыя перадачы.

У жніўні форвард заключыў кантракт з дзяржынскім «Арсеналам», але за каманду Betera Найвышэйшай лігі пакуль не згуляў.

У складзе каманды Беларусі да 19 гадоў Губарэвіч вызначыўся шасцю галамі ў чатырох матчах.

Абаронца менскага «Дынама» Павел Апяцёнак звярнуў увагу «Кальяры» і «Андэрлехта».

Пра гэта паведаміў расейскі журналіст Анар Ібрагімаў.

Паводле звестак крыніцы, менскі клуб ацэньвае свайго футбаліста прыкладна на 300 тысячаў еўраў.

У гэтым сезоне Апяцёнак правёў за «Дынама» 11 сустрэчаў ва ўсіх турнірах, адзначыўшыся голам, дзейснай перадачай і адным папярэджаннем.

«Кальяры» закончыў чэмпіянат Італіі 2024/25 на 15-й пазіцыі з 36 баламі.

«Андэрлехт» заняў чацвёртае месца ў бельгійскай Пра-Лізе.

Нагадаем, бельгійскі клуб раней перасякаўся з «Дынама» ў Лізе Еўропы.

У 2024 годзе менчукі пацярпелі дзве паразы (0:1, 0:1).