Зяленскі ўручыў Трампу падарунак, перададзены воінам УСУ

• 19.08.2025, 10:44

Прэзідэнт ЗША не застаўся ў даўгу.

Прэзідэнт Украіны Уладзімір Зяленскі і прэзідэнт ЗША Дональд Трамп падчас размовы ў Белым доме 18 жніўня абмяняліся падарункамі. Пра гэта гаворыцца на сайце прэзідэнта Украіны.

Так, адзначаецца, што Зяленскі падарыў Трампу клюшку для гульні ў гольф, якую яму перадаў малодшы сяржант УСУ Канстанцін Картаўцаў.

Са слоў прэзідэнта Украіны, воін страціў нагу ў першыя месяцы поўнамаштабнага расейскага ўварвання, ратуючы пабрацімаў, і пасля гэтага гольф стаў для яго часткай рэабілітацыі і дапамог аднавіць фізічную і эмацыйную раўнавагу.

У паведамленні гаворыцца, што кіраўнік дзяржавы паказаў амерыканскаму лідару відэа, у якім Картаўцаў звяртаецца з просьбай да Трампа дапамагчы Украіне скончыць вайну справядлівым і працяглым мірам.

У сваю чаргу, прэзідэнт ЗША прыняў падарунак і запісаў відэа з падзякай украінскаму воіну за клюшку, а таксама падарыў Зяленскаму сімвалічныя ключы ад Белага дома.