Ці можна падарожнічаць па Шэнгенскай зоне з аднаразовай польскай візай?

• 18.08.2025, 17:42

Юрысты адказалі.

Некаторыя беларусы атрымліваюць польскія візы тыпу D з адзнакай "1 уезд" (jednokrotna / single entry). Юрысты ініцыятывы Partyzanka патлумачылі, ці можна з такой візай ездзіць па краінах Шэнгенскай зоны.

- Віза тыпу D з адзнакай "1 уезд" (jednokrotna / single entry) азначае, што вы маеце права аднаразова перасекчы мяжу Польшчы і застацца тут на ўвесь тэрмін, указаны ў візе. Нават калі такая віза выдадзена на 365 дзён знаходжання, гэта не дае вам права ўязджаць у Польшчу некалькі разоў.

Калі вы выедзеце з такой візай з Польшчы, напрыклад, у Літву, то вам нельга вярнуцца ў Польшчу. А каб гэта зрабіць, патрэбна новая віза ці іншы дакумент для знаходжання. Гэтае правіла заснавана на Канвенцыі аб прымяненні Шэнгенскага пагаднення.