Як улады пакінулі гамельчукоў без Цэнтральнага пляжа на цэлае лета

• 18.08.2025, 14:08

Прычынай гэтага стаў закрыты мост.

Гомельскія ўлады, фактычна, пазбавілі гамельчукоў Цэнтральнага пляжа, упадабанага месца адпачынку, у сёлетнім купальным сезоне. Усё лета, са сведчанняў жыхароў горада, галоўны пляж пуставаў - нават у спякотнае надвор'е. Прычынай гэтага стаў закрыты пешаходны мост праз Сож - асноўны шлях да пляжу з цэнтра Гомеля, піша «Флагшток».

Рамонт прыпаў акурат на пляжны сезон, хоць раней планавалася, што працы скончацца ў сярэдзіне лета - да піку адпачынкаў і датуль, калі вада ў Сожы прагрэецца.

Першапачаткова меркавалася выканаць работы ў першай палове года. У змене да задання на праектаванне (кастрычнік 2024) года тэрмінамі пачатку і заканчэння будаўніцтва быў указаны перыяд студзень-чэрвень 2025 года. У самім праекце пачаткам прац быў пазначаны люты, а канцом - ліпень.

Але пасля тэрміны зрушылі і пачалі рамонт толькі ў траўні, а заканчэнне запланавалі на лістапад.

Улады запусцілі новы аўтобусны маршрут да пляжу ад плошчы Леніна, але ахвочых дабірацца ў аб'езд і за грошы выявілася мала. Арганізавалі і рэйсы катэры ад прычала «Кіеўскі спуск» да другога берага па 2 рублі ў адзін бок. Аднак і гэты варыянт не стаў папулярным.

Самыя спякотныя дні лета ўжо прайшлі, але і ў тыя цёплыя дні, калі Цэнтральны пляж мог бы прывабіць сотні, ён заставаўся напаўпустым.

Гэта пацвярджаюць многія відэа, якія паглядзелі журналісты за чэрвень, ліпень і жнівень. Напрыклад, сонечным вечарам 11 ліпеня, калі тэмпература вады ў Сожы дасягала 24 градусы, пляж быў амаль пусты.

«Дзе людзі?» - спыталі ў каментарах.

«Ідзе рамонт моста праз раку, і на пляж трэба з цэнтра пад'язджаць на аўтамабілі ці аўтобусе. Пляжаў у горадзе шмат. Мабыць, людзі на іншых», - адказаў карыстальнік.

У апошнюю спякотную суботу, 16 жніўня, Цэнтральны пляж таксама заставаўся напаўпустым, як відаць на адным з ролікаў.