Трамп назваў умову запрашэння Пуціна на трохбаковую сустрэчу

• 16.08.2025, 14:57

Многае залежыць ад перамоў прэзідэнта ЗША з Зяленскім.

Прэзідэнт ЗША Дональд Трамп паабяцаў прызначыць сустрэчу з расейскім дыктатарам Уладзімірам Пуціным, калі перамовы з украінскім лідарам Уладзімірам Зяленскім 18 жніўня пройдуць паспяхова.

Пра гэта Трамп паведаміў у сацсетцы Truth Social.

«Прэзідэнт Зяленскі прыбудзе ў Вашынгтон, у Авальны кабінет, у панядзелак пасля абеду. Калі ўсё пойдзе добра, мы прызначым сустрэчу з прэзідэнтам Пуціным», - заявіў ён.

На думку Трампа, такая сустрэча можа «выратаваць жыцці мільёнаў людзей».

Нагадаем, па дарозе з Аляскі ў Вашынгтон Дональд Трамп правёў тэлефонныя размовы з прэзідэнтам Украіны Уладзімірам Зяленскім і лідарамі краін NATO. Ён расказаў аб выніку сустрэчы з Пуціным.

Зяленскі паведаміў, што ў панядзелак, 18 жніўня, паедзе ў Вашынгтон для абмеркавання дэталяў заканчэння вайны з Трампам.