Расейскую дэлегацыю павезлі да Трампа на «какаінавым» самалёце
- 15.08.2025, 14:36
Борт атрымаў скандальную вядомасць сем гадоў таму.
Расейская дэлегацыя адправілася на Аляску, дзе пройдуць перамовы з прэзідэнтам ЗША Дональдам Трампам, на «какаінавым» самалёце — борце, які стаў вядомы сем гадоў таму, калі ў будынках расейскага пасольства ў Буэнас-Айрэсе канфіскавалі амаль 400 кг какаіну. Аб гэтым піша The Moscow Times.
Самалёт Іл-96 з бартавым нумарам RA-96023, які ўчора вылецеў з аэрапорта Унукава блізу 8 раніцы і праз некалькі гадзін прыбыў у амерыканскі Анкарыдж з расейскай дэлегацыяй на борце, стаў вядомы ў 2018 годзе, калі ў будынках расейскага пасольства ў Буэнас-Айрэсе канфіскавалі амаль 400 кг какаіну. Аб гэтым піша The Moscow Times.
Аргенцінская жандармерыя пасля гэтага апублікавала фота расейскага лайнера, на якім, як мяркуецца, у краіну і быў дастаўлены той самы какаін. Расследаванне паказала, што для гэтага выкарыстоўвалася дыпламатычная пошта МЗС Расеі.
Паводле версіі следства, у 2016 годзе бізнэсовец Андрэй Кавальчук набыў наркотык у Аргенціне, пасля чаго рэчыва спакавалі ў чамаданы і схавалі ў дапаможным памяшканні школы пры расейскім пасольстве ў Буэнас-Айрэсе.
Алі Абянаў, які працаваў у той час загадчыкам гаспадаркі ў пасольстве, спакаваў валізкі ў спецпаперу, заляпіўшы зверху сургучнымі пячаткамі, як гэта робяць з дыпламатычнай поштай. У Абянава скончыўся кантракт, і ён вярнуўся ў Маскву, а яго зменшчык знайшоў падазроны груз. Служба бяспекі пасольства выявіла валізкі і какаін.
Аргенцінская паліцыя канфіскавала наркотык і знішчыла яго. Замест яго ў валізкі паклалі пакеты з мукой, апячаталі і адправілі ў Маскву.
12 снежня 2017 года ў Маскве пры спробе атрымаць пасылкі з Буэнас-Айрэса былі затрыманыя Алі Абянаў і бізнэсоўцы Уладзімір Калмыкоў і Ішцімір Худжамаў. Яшчэ аднаго фігуранта справы - Андрэя Кавальчука затрымалі ў Нямеччыне і экстрадавалі ў Расею. Ніхто з фігурантаў віну не прызнаў. Яны сцвярджалі, што займаліся законным бізнэсам, а ў чамаданах першапачаткова знаходзіліся кава, цыгары і напаўкаштоўныя камяні. Ім невядома, як замест тавараў туды патрапіў какаін.
У 2021 годзе ў судзе Масквы прысяжныя большасцю галасоў прызналі вінаватымі чатырох фігурантаў гэтай «какаінавай справы»: Алі Абянава, Уладзіміра Калмыкова, Андрэя Кавальчука і Ішціміра Худжамава.